बदलापुरातील कात्रप भागात एका दुकानासमोरील भाग कोसळून तेथे असलेली टपरी खाली असलेल्या गटारात पडली. ८ ते १० फूट खोल गटारात ही टपरी पडली असून सुदैवाने यावेळी टपरीत चालक व ग्राहक नसल्याने मोठी दुर्घटना झाली नाही. परंतु, या घटनेमुळे शहरातील धोकादायक इमारतींचा प्रश्न व निकृष्ट बांधकामांचा मुद्दा ऐरणीवर आला आहे.
स्पंदन रुग्णालयालगत असलेल्या गणेश कृपा या इमारतीत बुधवारी रात्री हा प्रकार घडला. या इमारतीत तळमजल्यावर दुकानांचे पाच ते सहा गाळे आहेत. ही इमारत १५ ते २० वष्रे जुनी आहे. या इमारतीला अनेक ठिकाणी तडे गेले असून पालिकेचे त्याकडे दुर्लक्ष झालेले आहे.