ठाणे : परदेशात जाणारे कर्मचारी, विद्यार्थी आणि टोकियो ऑलिम्पिकमधील सहभागी खेळाडूंचे पूर्व नोंदणीविना लसीकरण करण्याचा निर्णय पालिका प्रशासनाने घेतला आहे. त्यानुसार माजिवडा येथील पोस्ट कोविड लसीकरण केंद्रामध्ये लसीकरणाचे विशेष सत्र सुरू करण्यात आले आहे. परदेशातील विद्यापीठांमध्ये उच्च शिक्षणासाठी जाणारे विद्यार्थी, नोकरीसाठी जाणारे कर्मचारी वर्ग तसेच टोकियो ऑलिम्पिकमध्ये सहभागी होणारे खेळाडू यांना लसीकरणाशिवाय परदेशात प्रवेश मिळणार नाही. त्यामुळे या सर्वांचे प्राधान्याने लसीकरण करण्याचा निर्णय महापालिका आयुक्त डॉ. विपिन शर्मा यांनी घेतला आहे. त्यासाठी माजीवडा येथील पोस्ट कोविड लसीकरण केंद्रात पूर्व नोंदणीविना सकाळी ११ ते दुपारी १ यावेळेत लसीकरणाचे विशेष सत्र आयोजित करण्यात आले आहे. या सर्वांच्या कागदपत्रांची पडताळणी केल्यानंतरच कोविन अॅपवर सर्व कागदपत्रांच्या नोंदी करूनच लस देण्यात येणार आहे. यामध्ये कोविशिल्डचा पहिला व दुसरा डोस देण्यात येत असून पहिला डोस घेतल्यानंतर दुसरा डोस २८ दिवसांनंतर आणि ८४ दिवसांपूर्वी घेतला जाऊ शकतो, असे पालिकेने म्हटले आहे.