भाईंदर पश्चिम येथील प्रभाग क्रमांक २३ मधील भाजपा नगरसेविका वर्षा भानुशाली यांना ठाणे न्यायालयाकडून पाच वर्षाची शिक्षा आणि पाच लाख रुपये दंड ठोठावण्यात आला आहे. वर्षा भानुशाली यांना २०१४ रोजी ५० हजार रुपयांची लाच घेताना रंगेहाथ पकडण्यात आलं होते. वर्षा भानुशाली यांनी ६ जून २०१४ मध्ये एका गाळ्याची ऊंची वाढवण्यासाठी व दुरुस्तीप्रकरणी एक लाख साठ हजार रुपये लाच मागितली होती. त्याचा पहिला हप्ता घेताना ठाणे लाचलुचपत प्रतिबंधक विभागाने सापळा रचून भानुशाली यांना रंगेहाथ पकडले होते. जानकी हेरिटेज या त्यांच्या राहत्या घरातून ५० हजार रुपये घेताना त्यांना पकडण्यात आलं होतं. याप्रकरणी ठाणे न्यायालयाने त्यांना पाच वर्षाचा कारावास व पाच लाख रुपये दंड तसेच दंड न भरल्यास सहा महिन्यांची शिक्षा सुनावली आहे. भानुशाली या २००७ मध्ये भाजपाचे माजी आमदार नरेंद्र मेहता यांच्या सोबत एकाच पॅनलमधून अपक्ष उमेदवार म्हणून निवडून आल्या होत्या. आता देखील त्या भाजपाच्या नगरसेविका असून भाईंदर पश्चिमच्या मुर्धा, राई, मोरवा,आंबेडकर नगर व दीडशे फूट भागातून प्रभाग २३ मधून निवडून आल्या आहेत.
