लोकसत्ता खास प्रतिनिधी
ठाणे: शहराच्या मध्यवर्ती भागातील सुप्रसिद्ध ‘प्रशांत कॉर्नर’ या मिठाईच्या दुकानासमोरील बेकायदा बांधकामासह शेडवर पालिका प्रशासनाने नुकतीच कारवाई केली आहे. या कारवाईनंतर समाजमाध्यमांवर वेगवेगळ्या प्रतिक्रिया उमटू लागल्या आहेत.
ठाणे येथील पाचपाखाडी परिसरात सुप्रसिद्ध ‘प्रशांत कॉर्नर’ हे मिठाईचे दुकान आहे. या दुकानांमध्ये मिठाई घेण्यासाठी दररोज मोठी गर्दी असते. या दुकानासमोरील जागेत एक शेड उभारण्यात आली होती आणि त्याचबरोबर बांधकामही करण्यात आले होते. गेल्या अनेक वर्षांपासून असलेल्या या बेकायदा बांधकामावर पालिका अतिक्रमण विभागाच्या पथकाने नुकतीच कारवाई केली. यामध्ये बांधकाम आणि शेड तोडून टाकण्यात आली.
दरम्यान, या परिसरात अनेक दुकानांनी बेकायदा शेड उभारण्याबरोबरच बेकायदा बांधकाम केले आहे. परंतु ‘प्रशांत कॉर्नर’ या दुकानावरच केवळ कारवाई झाल्याने समाजमाध्यमांवर वेगवेगळ्या प्रतिक्रिया उमटत आहेत.
