बदलापूर स्थानकात कर्जत लोकलचा थांबा तीन डबे मागे; छप्पर उभारणीच्या कामामुळे रेल्वे प्रशासनाकडून थांब्यात फेरबदल

मुंबई रेल्वे विकास प्राधिकरणाच्या माध्यमातून बदलापूर रेल्वे स्थानकाचा चेहरा मोहरा बदलण्यात येतो आहे. गेल्या काही वर्षात येथे होम फलाट उभारून तो पुन्हा बंद करण्यात आला. स्थानकात नव्याने पादचारी पूल, स्वयंचलित जीने बसवण्यात आले आहेत. फलाट क्रमांक एक, दोन स्वतंत्र करण्यात आले आहेत. गर्दी विभाजनासाठी हा पर्याय रेल्वेसाठी फायदेशीर ठरला आहे. त्यासोबतच फलाट क्रमांक एक आणि दोनवर संयुक्तपणे डेक उभारणी केली जाते आहे. कर्जत बाजूकडील पादचारी पुलापासून फलाटावरील डेकपर्यंत छप्पर उभारले जाणार आहे. अनेक वर्षांपासूनची मागणी पूर्ण होत असल्याने प्रवाशांमध्ये समाधानाचे वातावरण आहे.

मात्र या कामासाठी आता कर्जतकडे जाणाऱ्या लोकलचा थांबा बदलण्यात येणार आहे. सध्या कर्जतकडे जाणारी लोकल ही कर्जतच्या दिशेने फलाटाच्या टोकाला थांबत असते. मात्र आता छप्पर उभारणीच्या कामासाठी लोकलचा थांबा बदलला जाणार आहे. रेल्वे प्रशासनाने घेतलेल्या निर्णयानुसार आता कर्जतकडे जाणारी कर्जत आणि खोपोली लोकल ही फलाट क्रमांक दोनवर तीन डब्बे मागे थांबेल. मुंबईच्या दिशेच्या फलाटाच्या टोकाला ही लोकल थांबेल. त्यामुळे प्रवाशांना तीन डब्बे मागे थांबून लोकल पकडावी लागणार आहे.

रेल्वे प्रशासनाने हे छप्पर उभारणीचे काम पावसाळ्यापूर्वी पूर्ण करण्याचे आश्वासन दिले आहे. काम पूर्ण झाल्यानंतर लोकलचा थांबा पुन्हा पूर्ववत ठिकाणी आणला जाईल, अशीही माहिती रेल्वे स्थानक व्यवस्थापकांनी दिली आहे. त्याचबरोबर, मुंबईकडील टोकावरील शेडचे कामही लवकरच पूर्ण करण्यात येणार असल्याचे प्रशासनाने स्पष्ट केले आहे. मात्र सुरूवातीचे काही दिवस प्रवाशांचा गोंधळ उडण्याची दाट शक्यता आहे.

छप्पराअभावी प्रवाशांचे हाल

फलाट क्रमांक दोनवर छप्पर नसल्याने प्रवाशांचे हाल होत आहेत. गेल्या काही दिवसात उन्हाचा पारा वाढत असल्याने प्रवाशांना छप्पर असलेल्या ठिकाणी थांबून लोकल येण्याचा काही मिनिटे आधी पुन्हा उन्हात जावे लागते. अनेक प्रवासी पादचारी पुलाच्या छप्पराचा आसरा घेऊन थांबलेले दिसतात.