VIDEO: भिवंडीत चार मजली इमारत कोसळून नऊ जणांचा मृत्यू; NDRF ची माहिती

घटनेची माहिती मिळताच अग्निशमन दल, राष्ट्रीय आपत्ती प्रतिसाद दल (NDRF) आणि ठाणे आपत्ती प्रतिसाद दलाच्या (TDRF) तुकड्या घटनास्थळी दाखल झाल्या असून, युद्धपातळीवर शोध व बचावकार्य सुरू आहे.

रात्रभर बचावकार्य सुरू; दोघांना सुखरूप बाहेर काढले

अपघाताचे गांभीर्य ओळखून बचाव पथकांनी तात्काळ मलब्यात अडकलेल्यांचा शोध घेण्यास सुरुवात केली. रात्रभर चाललेल्या मोहिमेत आतापर्यंत दोन जणांना ढिगाऱ्याखालून सुखरूप बाहेर काढण्यात यश आले आहे.

प्राथमिक माहितीनुसार, दुर्घटनेच्या वेळी इमारतीत ६ मजूर आणि ५ स्थानिक रहिवाशांसह सुमारे ११ जण उपस्थित होते. त्यामुळे ढिगाऱ्याखाली अजूनही काही नागरिक अडकले असण्याची शक्यता असून, त्यांना सुरक्षित बाहेर काढण्यासाठी अत्याधुनिक उपकरणे आणि फ्लड लाईट्सच्या मदतीने रेस्क्यू ऑपरेशन राबवले जात आहे.

महापालिकेने आधीच घोषित केली होती ‘धोकादायक इमारत’

स्थानिक प्रशासनाने दिलेल्या माहितीनुसार, कोसळलेली ‘कोहिनूर अपार्टमेंट’ ही इमारत अत्यंत जुनी आणि जर्जर झाली होती. भिवंडी-निझामपूर शहर महानगरपालिकेने या इमारतीला आधीच अतिधोकादायक म्हणून घोषित केले होते आणि ती खाली करण्याच्या नोटीस व सूचनाही दिल्या होत्या. मात्र, गुरुवारी रात्री नागरिक गाढ झोपेत असताना ही इमारत अचानक कोसळल्याने कोणालाही बाहेर पडण्याची संधीच मिळाली नाही.

“धोकादायक इमारती तात्काळ रिकाम्या करा” – महापौरांचे आवाहन

या भीषण दुर्घटनेनंतर भिवंडी-निझामपूर शहर महानगरपालिकेचे महापौर नारायण चौधरी यांनी घटनास्थळी भेट देऊन परिस्थितीचा आढावा घेतला.

“भिवंडी शहरात महापालिकेने अनेक इमारती अतिधोकादायक म्हणून घोषित केल्या आहेत. ढिगाऱ्याखाली अडकलेल्या नागरिकांना लवकरात लवकर बाहेर काढण्यासाठी आमचे सर्वतोपरी प्रयत्न सुरू आहेत. परंतु, जे नागरिक आजही अशा जर्जर आणि धोकादायक इमारतींमध्ये राहत आहेत, त्यांनी स्वतःचा आणि आपल्या कुटुंबाचा जीव धोक्यात न घालता तात्काळ घर मोकळे करावे,” असे आवाहन महापौर नारायण चौधरी यांनी केले आहे.

सध्या घटनास्थळी वैद्यकीय पथके आणि अनेक रुग्णवाहिका तैनात ठेवण्यात आल्या आहेत. मलब्यातून बाहेर काढण्यात येणाऱ्या जखमींवर तात्काळ उपचारासाठी स्थानिक रुग्णालयांना सतर्कतेचा इशारा देण्यात आला आहे. दुर्घटनेतील जखमी आणि मृतांची अधिकृत माहिती बचावकार्य पूर्ण झाल्यानंतरच स्पष्ट होणार असल्याचे प्रशासनाने सांगितले आहे.

बातमी अपडेट होत आहे.