कल्याणमध्ये नागरिकांचा मोर्चा; तरुणीवरील अत्याचार प्रकरण; दबावाला बळी न पडता तपासाची मागणी    

रहिवासी उत्स्फूर्तपणे मोर्चात सहभागी झाले होते. तरूणीच्या आत्महत्येप्रकरणी पोलिसांनी सात तरूण आणि एका तरूणीला अटक केली आहे. त्यांत विकासकांची मुलेही आहेत.  आरोपी तरूण दीड वर्षांपासून लैंगिक अत्याचार करून पीडितेचा शारीरिक, मानसिक छळ करत होते. लैंगिक अत्याचाराच्या चित्रफितीही त्यांनी  तयार केल्या होत्या. त्या समाज माध्यमांवर प्रसारीत करून मयत तरूणीला धमकावले जात होते. या त्रासाला कंटाळून तिने आत्महत्या केली. त्यामुळे  धनदांडग्यांच्या मुलांना कठोर शिक्षा झालीच पाहिजे, अशाप्रकारचे फलक हातात घेऊन, रहिवाशांनी घोषणाबाजी केली. पीडितेच्या कुटुंबीयांच्या  जीविताला धोका निर्माण होऊ नये याची दक्षता पोलिसांनी घ्यावी, अशी मागणी मोर्चेकऱ्यांनी केली. शिष्टमंडळाने कोळसेवाडी पोलीस ठाण्याच्या वरिष्ठ अधिकाऱ्यांची भेट घेऊन त्यांना एक निवेदन दिले.