Lockdown: ठाण्यात नाकाबंदी; पण अत्यावश्यक प्रवाशांना सूट – प्रशासन

ठाण्यात लॉकडाउनच्या कडक अमलबजावणीला सुरुवात

संग्रहित छायाचित्र
करोना विषाणूचा वाढता प्रादुर्भाव रोखण्यासाठी संपूर्ण ठाणे शहर दहा दिवस टाळेबंद करण्याचा निर्णय महापालिका प्रशासनाने मंगळवारी घेतला. २ जुलैपासून ते १२ जुलै रोजी सकाळी ७ वाजेपर्यंत शहरात टाळेबंदी लागू असणार आहे. करोनाची साखळी तोडण्यासाठी जाहीर करण्यात आलेल्या लॉकडाउनला आजपासून सुरुवात झाली असून नियमांचं उल्लंघन होणार नाही यासाठी प्रशासन पुरेपूर काळजी घेत आहे. दरम्यान मुंबईत अत्यावश्यक आणि कामाला जाणाऱ्यांना सोडलं जात असल्याची माहिती पोलीस उपायुक्त अविनाश अंबुरे यांनी दिली आहे.

मुलुंड चेकनाका ते तीन हात नाका उड्डाणपूल पर्यंत वाहतूक कोंडी झाली असून पोलिसांनी नितीन कंपनी, रहेजा, तीन हात नाका, कापूरबावडी, पातलीपाडा, ब्रह्मांड, गायमुख परिसर तसेच मुख्य मार्गावर नाकाबंदी केली आहे. यावेळी विनाकारण फिरणाऱ्यांची वाहनं जप्त केली जात आहेत.

ठाणे जिल्हाही कुलूपबंद
करोनाचा वाढता प्रादुर्भाव रोखण्यासाठी ठाणे जिल्ह्यातील शहरांमध्ये टाळेबंदीचा निर्णय महापालिका प्रशासनांनी घेतला असताना आता ग्रामीण भागांतही निर्बंध लागू करण्याचा निर्णय जिल्हाधिकारी राजेश नार्वेकर यांनी घेतला. बुधवारी या निर्णयाची घोषणा करण्यात आली.

या गोष्टींना परवानगी
आपत्कालीन वैद्यकीय सेवेसाठी प्रवाशांच्या वाहतुकीस परवानगी. खासगी वाहनांत चालकाखेरीज केवळ एका प्रवाशाला परवानगी.
परवानगी असलेल्या जीवनावश्यक वस्तु, आरोग्य सेवा आणि या आदेशांतर्गत मान्य कृतींकरिता परवानगी.
घरी विलगीकरणात असलेल्यांनी नियमांचे पालन केले नाहीतर, संबंधित दंडात्मक कारवाईसाठी जबाबदार असेल आणि त्यांचे पालिका विलगीकरण कक्षात स्थलांतर.
व्यावसायिक आस्थापना कार्यालये, कारखाने, कार्यशाळा, गोदाम यासह सर्व दुकाने बंद असतील. सतत प्रक्रिया आणि फार्मास्युटिकल्स या आवश्यक असलेल्या उत्पादन आणि उत्पादक युनिटला परवानगी असेल. डाळ व तांदुळ गिरणी, खाद्य व संबंधित उद्योग, दुग्धशाळा, खाद्य व चारा इत्यादींच्या आवश्यक वस्तुंच्या उत्पादनाची युनीटस चालविण्यास परवानगी असेल.
सरकारी कार्यालये या कालावधीत कमीतकमी कर्मचाऱ्यांसह चालविण्यास परवानगी असेल. तिथे तीन फुट समाजिक अंतर पालन आणि सॅनिटायझरची व्यवस्था करणे आवश्यक असेल.
मद्य विक्रीची दुकाने केवळ घरपोच सेवेस परवानगी असेल.
जे उद्योग युनीट सुरू आहेत, ते तसेच सुरु राहतील.
लग्न सोहळ्यासाठी ५० व्यक्तींच्या मर्यादित संख्येस मुभा असणार आहे.
सर्व खासगी व सरकारी रुग्णालयांमध्ये सर्व वैकल्पिक शस्त्रक्रिया नियोजित करण्यात याव्यात.

या गोष्टींना मनाई
अत्यावश्यक आणि नाशवंत वस्तुंच्या ने-आण करण्याशिवाय इतर सर्व कारणांकरीता महापालिका क्षेत्रात टाळेबंदी
इंटरसिटी, एमएसआरटीसी बस आणि मेटोसह सर्व सार्वजनिक परिवहन सेवांची वाहतूक.
टॅक्सी, रिक्षा यांची प्रवासी सेवा
सर्व आंतरराज्यीय बस आणि प्रवासी वाहतूक सेवांचे (खासगी वाहनांसह) तसेच खासगी ऑपरेटरांकडून कामकाज बंद. बाहेरून येणाऱ्या आणि बाहेर जाणाऱ्या प्रवासी वाहनांना परवानगी असेल.
सार्वजनिक ठिकाणी अत्यावश्यक बाबींच्या खरेदीसाठी पाच पेक्षा जास्त व्यक्तींना एकत्र येण्यास प्रतिबंध आहे.

प्रतिबंधातून यांना वगळले..
बँका, एटीएमस, विमा आणि संबंधित बाबी, प्रिंट आणि इलेक्टॉनिक माध्यमे, आय.टी आणि आयटीईएस, टेलीकॉम, टपाल, इंटरनेट, डाटा सेवा, पुरवठा साखळी, जीवनावश्यक वस्तुंची वाहतुक आणि उपलब्धता, कृषी वस्तु, उत्पादने, सर्व वस्तुंची निर्यात आणि आयात. अन्न, फार्मास्युटिकल्स, वैद्यकीय उपकरणे यासह आवश्यक वस्तुंचे ई-कॉमर्स वितरण, रुग्णालये, फार्मेसि आणि ऑप्टिकल स्टोअर्स, फार्मास्युटिकल्स उत्पादन, त्याचे व्यापारी आणि त्यांची वाहतूक,

पेटोल पंप, एलपीजी गॅस, तेल एजन्सी, त्यांची गोदामे, त्यांच्याशी संबंधित वाहतूक आणि केवळ अत्यावश्यक सेवेतील पासधारक, सर्व सुरक्षा आणि सुविधा व्यवस्थापन सेवा, खासगी आस्थपना, आवश्यक सेवा आणि कोवीडच्या नियंत्रणासाठी साहाय करणाऱ्या सेवा.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: Coronavirus lockdown in thane sgy 87