Thane News ठाणे : जिल्हा परिषद ठाणे अंतर्गत समाज कल्याण विभाग, कृषी विभाग, महिला व बाल विकास विभाग आणि पशुसंवर्धन विभाग यांच्यामार्फत विविध वैयक्तिक लाभाच्या योजना राबविण्यात येत आहेत. या योजनांचा लाभ घेण्यासाठी दिव्यांग, मागासवर्गीय, शेतकरी, महिला आणि पशुपालक या सर्व पात्र लाभार्थ्यांकडून अर्ज ३१ ऑगस्ट २०२५ पर्यंत अर्ज मागविण्यात आले आहेत. हे अर्ज जिल्हा परिषदेच्या अधिकृत संकेतस्थळावर https://zpthaneschemes.com या लिंकवर ऑनलाईन सादर करावेत, असे आवाहन संबंधित विभागामार्फत करण्यात आले आहे.
ही अर्ज प्रक्रिया पूर्णपणे पारदर्शक आणि सुलभ ठेवण्यात आली आहे. सर्व पात्र लाभार्थ्यांनी ही सुवर्णसंधी साधून वेळेत अर्ज करावेत. स्थानिक ग्रामविकास अधिकारी, सरपंच, अंगणवाडी कर्मचारी, शाळा व महाविद्यालयांनी यासंदर्भातील माहिती नागरिकांपर्यंत पोहोचवावी, जेणेकरून अधिकाधिक लाभार्थी या योजनांचा लाभ घेऊ शकतील, अशा सूचना जिल्हा परिषदेच्या वतीने करण्यात आली आहे. प्राप्त झालेल्या लाभार्थ्यांची अर्ज पडताळणी तालुकास्तरावर १ सप्टेंबर ते ०७ सप्टेंबर या कालावधीत केली जाणार आहे. तर, जिल्हा स्तर तपासणी ८ सप्टेंबर ते १५ सप्टेंबर या कालवधीत केली जाणार असल्याची माहिती जिल्हा परिषदेच्या वतीने देण्यात आली.
अशा आहेत विभाग निहाय्य योजना
समाज कल्याण विभाग
समाज कल्याण विभागाच्या मार्फत ५% दिव्यांग कल्याण सेस अंतर्गत दिव्यांग लाभार्थ्यांना स्वयंरोजगारासाठी प्रोत्साहन, तीन चाकी वाहन खरेदीसाठी अनुदान, दिव्यांग व्यक्तींना विवाहासाठी प्रोत्साहनपर अनुदान, दिव्यांग शेतकऱ्यांना शेतीपुरक व्यवसायासाठी शेळीपालन वराहपालन, मत्स व दुग्धव्यवसाय इत्यादीसाठी अर्थसहाय्य, दिव्यांग पालकाच्या मुलीसाठी माझी लेक योजनेअंतर्गंत ५० हजार रुपये मुदतठेव रक्कम ठेवणे.
तसेच उच्च व तांत्रिक शिक्षणासाठी अपंग विद्यार्थ्याना विशेष शिष्यवृत्ती देणे. तर, २०% जिल्हा परिषद सेस अंतर्गत इयत्ता ५ वी ते ९ वीच्या मागासवर्गीय विद्यार्थ्यांना सायकल पुरविणे, शिक्षणासाठी आर्थिक सहाय्य करणे
तर, व्यवसायासाठी आर्थिक सहाय्य देणे व वैयक्तिक लाभार्थी/महिला बचत गट यांना लघुउद्योगासाठी अर्थिक सहाय्य करणे अशा विविध योजना समाज कल्याण विभागाच्या मार्फत राबविल्या जातात.
कृषी विभाग
कृषी विभागा अंतर्गत विविध सिंचन साहित्याचा पुरवठा,सुधारित कृषि औजारांचा पुरवठा, पिक संरक्षणाकरीता काटेरी तार/सौर कुंपणासाठी अर्थ सहाय्य, कृषि क्षेत्रात प्लॅस्टिक तंत्रज्ञानाच्या वापरास प्रोत्साहन देणे अशा विविध योजना राबविल्या जात आहेत.
महिला व बाल विकास विभाग
महिला व बाल विकास विभागाच्या मार्फत महिलांना घरघंटी,पिको फॉल मशीन, शिलाई मशीन हे साहित्य पुरविणे, इयत्ता ५ वी ते १२ वी पर्यंत शिकणाऱ्या मुलींना सायकल वाटप, इयत्ता ७ वी ते १२ वी पास मुलींना संगणक प्रशिक्षण आणि विशेष प्राविण्य मिळवलेल्या मुलां-मुलींचा सत्कार करणे अशा योजना राबविल्या जातात.
पशुसंवर्धन विभाग पशुसंवर्धन विभागा अंतर्गत ५०% अनुदानावर एक संकरित गाय / म्हैस वाटप, ५०% अनुदानावर (५ १) स्थानिक जातीचा शेळी गट वाटप आणि ६० % अनुदानाने तबेला धारकांसाठी रबरी मॅट, कडबाकुट्टी यंत्र, मिल्किंग मशीन पुरवठा अशा योजना राबविल्या जातात.
