डोंबिवलीत आनंद बालभवनमध्ये तीन हजार रोपांचे गुलाब फुलांचे प्रदर्शन

डोंबिवली शहर परिसरातील नागरिकांना देश, विदेशातील गुलाब फुलांच्या विविध प्रजाती पाहण्यास मिळाव्यात, त्यांची लागवड करण्याची संधी मिळावी या उद्देशातून मागील सोळा वर्षापूर्वी डोंबिवलीत स्थानिक आमदार रवींद्र चव्हाण यांच्या संकल्पनेतून गुलाब फुलांचे प्रदर्शन झाले. अखंड सोळा वर्ष हे प्रदर्शन दरवर्षी जानेवारी, फेब्रुवारी महिन्यात भरविले जाते.

या प्रदर्शनाचे उद्घाटन भारतीय गुलाब मंडळाचे अध्यक्ष आणि गुलाब फूल तज्ज्ञ डाॅ. विकास म्हस्कर, नगरसेवक राहुल दामले, नगरसेवक शशिकांत कांबळे, भाजप शहर अध्यक्ष मितेश पेणकर, महिला संघटक प्रिया जोशी यांच्या उपस्थितीत करण्यात आले. भाजप प्रदेशाध्यक्ष रवींद्र चव्हाण यांनी प्रदर्शनाला भेट देऊन प्रदर्शनातील यशस्वी गुलाब फूल उत्पादक आणि बक्षिसपात्र गुलाब रोपे लागवडकार यांचा सन्मान केला.

या प्रदर्शनाच्या ठिकाणी नागरिकांना आवडणाऱ्या गुलाब पुष्पांच्या रोपांची विक्री करण्यात येत आहे. शनिवारी दिवसभरात दोन ते तीन हजाराहून अधिक नागरिकांनी प्रदर्शनाला भेट दिली. कुटुंबीयांसह नागरिक गुलाब प्रदर्शनाला भेट देत आहेत. भेट देणाऱ्यांमध्ये शाळकरी मुलांचाही सहभाग आहे. महिला वर्ग गुलाब रोपे खरेदीला सर्वाधिक पसंती देत आहेत. शनिवारी दिवसभरात सातशे ते आठशेहून अधिक गुलाब फुलांच्या रोपांची विक्री झाली.

नाशिक, नागपूर, पुणे, मुंबई परिसरातील गुलाब फूल उत्पादकांनी आपली गुलाब रोपे प्रदर्शनात मांडली आहेत. नागपूरच्या प्रकाश तेलंग या गुलाब फूल उत्पादकाच्या लागवडीतील दोन सुगंधित डवरलेल्या गुलाब पुष्पांनी राजा आणि राणीचा सन्मान प्राप्त केला. तेलंग यांनी विविध प्रकारातील एकूण १६ बक्षिसे या प्रदर्शनात प्राप्त केली.

देश, विदेशातील गुलाब फुले नागरिकांंना एका ठिकाणी पाहता यावीत. नागरिकांना या फुलांची लागवड करण्याची आवड निर्माण व्हावी. घर, परिसर, इमारतीच्या गच्चीवर नागरिक या रोपांची लागवड करू शकतात. या प्रदर्शनात राजा आणि राणीचा रूबाब असलेल्या गुलाब पुष्पांची रोपासह मांडणी करण्यात आली आहे. डोंबिवली शहरासह पलावा, शिळफाटा, कल्याण, बदलापूर, दिवा परिसरातून नागरिक गुलाब प्रदर्शन पाहणी आणि गुलाबाची रोपे खरेदीसाठी येत आहेत.

देश, विदेशातील गुलाब फुले नागरिकांना एकाठिकाणी पाहता यावीत म्हणून भाजपचे आमदार रवींद्र चव्हाण यांच्या संकल्पनेतून गुलाब पुष्प प्रदर्शन डोंबिवलीत सुरू झाले. सोळा वर्ष अखंड हे प्रदर्शन सुरू आहे. गुलाब फूल उत्पादकांना या प्रदर्शनाच्या माध्यमातून आपली गुलाब फूल रोपे नागरिकांसमोर मांडता येतात. या माध्यमातून उत्पादक, नागरिक, गुलाब प्रेमी यांची नवीन साखळी तयार होते. – डाॅ. विकस म्हस्कर अध्यक्ष, भारतीय गुलाब पुष्प मंडळ. कल्याण.