डोंबिवली – वारंवार नोटिसा पाठवूनही अनेक वर्षाच्या थकीत मालमत्ता कराची ४० लाखाहून अधिक रकमेची थकबाकी भरण्यास टाळाटाळ करणाऱ्या चार थकबाकीदारांच्या गाळ्यांना टाळे लावण्याची कारवाई कल्याण डोंबिवली पालिकेच्या ग प्रभागाच्या अधिकाऱ्यांनी शुक्रवारी केली. या दुकानांच्या मालमत्ता कराची थकित रक्कम मालमत्ताधारकांनी विहित वेळेत भरणा केली नाही तर गाळ्यांवर जप्तीची कारवाई करून त्यांचा लिलाव करण्यात येईल, असे ग प्रभागाचे साहाय्यक आयुक्त संजयकुमार कुमावत यांनी सांगितले.
डोंबिवलीत ग प्रभाग हद्दीतील दत्तनगर भागातातील दोन गाळेधारकांकडे मालमत्ता कराची एकूण ३४ लाख ३९ हजार ७६७ रुपयांची थकबाकी आहे. उर्सेकरवाडीतील भागातील दोन गाळे धारकांकडे पाच लाख ६६ हजार रुपयांची थकबाकी आहे. ही कराची थकित रक्कम भरणा करण्यासाठी मालमत्ता कर विभागाने मालमत्ता करधारकांना वेळोवेळी नोटिसा पाठविल्या. त्यांच्याकडून विहित वेळेत कर भरणा करण्याची प्रक्रिया करण्यात आली नाही. चार गाळ्यांचे मालक मालमत्ता कर भरण्यास टाळाटाळ करत असल्याने मालमत्ता कर विभागाच्या उपायुक्त स्वाती देशपांडे यांच्या आदेशावरून ग प्रभागाचे साहाय्यक आयुक्त संजयकुमार कुमावत, अधीक्षक ज्ञानेश्वर कंखरे, लिपिक गोविंद पोटे, प्रभाकर कदम, भीमराव बडेकर यांच्या उपस्थितीत चार गाळ्यांना टाळे लावण्याची कारवाई केली.
हेही वाचा – ठाणे जिल्हा पुन्हा गारठला, जिल्ह्यातील तापमान सरासरी १२ अंश सेल्सिअस
हेही वाचा – लोकलमध्ये डोंबिवलीतील प्रवाशांना, मद्यधुंद खासगी सुरक्षकाची दमदाटी
मालमत्ता कर वसुलीची मोहीम सुरू करण्यात आली आहे. मालमत्ता कर थकबाकीदारांना पहिले कर भरण्यासाठी नोटिसा पाठविल्या जातात. या नोटिसांप्रमाणे थकबाकीदारांनी कर भरणा केला नाहीतर तर त्यांच्या मालमत्तांना टाळे लावण्यात येते. कर थकबाकीदारांनी कारवाई टाळण्यासाठी लवकरात लवकर कर भरणा करावा. – संजयकुमार कुमावत, साहाय्यक आयुक्त, ग प्रभाग, डोंबिवली.
