धक्कादायक! डोंबिवलीत डम्परखाली चिरडून महिलेचा मृत्यू, वाहनाकडे ‘आरटीओ’ची सक्षमता प्रमाणपत्र नसल्याचे स्पष्ट

धक्कादायक म्हणजे मलबा वाहू एमएमआरडीएच्या ठेकेदाराच्या डम्परची उपप्रादेशिक परिवहन विभागाकडून अत्यावश्यक प्रमाणपत्रे घेण्याची मुदत तीन ते चार वर्षापूर्वी संपली आहे. आणि तरीही हे वाहन रस्त्यावर चालविले जात होते. या अपघातानंतर हा सगळा प्रकार उघडकीला आला.

हा अपघात घडताच मारहाणीच्या भीतीने ट्रक चालक वाहन सोडून पळून गेला. डोंबिवली पश्चिम भागात एमएमआरडीएच्या निधीतून सीमेट काँक्रीट, गटारांची कामे सुरू आहेत. या कामासाठी ट्रक, डम्पर माल वाहतुकीसाठी वापरले जात आहेत. डोंबिवली पश्चिमेतील महाराष्ट्रनगर भागातील सिमेंट काँक्रिटीकरणाचे काम दोन दिवसांपासून एमएमआरडीएच्या ठेकेदाराने सुरू केले आहे. खोदाई करून काढलेली डांबर, खडी, माती डोंबिवली पश्चिमेतील गोपीनाथ चौक भागातील जगदंबा माता मंदिर परिसरात डम्परने (हायवा) आणून टाकली जाते.

ही कामे गुरूवारी सकाळी सुरू होती. डम्पर चालक मलबा खाली करून जगदांबा माता मंदिराकडून गोपीनाथ चौकाकडे चालला होता. डम्पर गोपीनाथ चौकात वळण रस्त्यावर असताना नम्रता नारायण साळवी (६५) ही महिला आपल्या नातेवाईक मुलाच्या दुचाकीवरून गोपीनाथ चौकाकडे जात होती. डम्पर गोपीनाथ चौकात वळणावर असताना डम्पर दुचाकीच्या दिशेने आल्याने दुचाकीला डम्परचा धक्का लागून दुचाकीच्या पाठीमागे बसलेली नम्रता साळवी ही महिला दुचाकीवरून पडून डम्परच्या मागच्या चाकाखाली आली.

विनापरवान्याची वाहने रस्त्यावर

डम्परचा (हायवा) वाहन क्रमांक एमएच ०५ डिके ८४०७ आहे. या डम्परची (हायवा) उपप्रादेशिक परिवहन विभाग कल्याण कार्यालयात डिसेंबर २०१९ मध्ये झाली आहे. या वाहनाचा विमा २९ नोव्हेंबर २०२३ रोजी संपला आहे. या वाहनाचे प्रदूषण नियंत्रण प्रमाणपत्र १२ डिसेंबर २०२२ रोजी संपले आहे. या वाहनाचे सक्षमता प्रमाणपत्र १३ डिसेंबर २०२३ रोजी संपले आहे. उपप्रादेशिक परिवहन विभागाच्या मोटार वाहनाच्या सर्व नियमांचे उल्लंघन करून हा हायवा ठेकेदाराकडून रस्ते कामासाठी चालविला जात होता, अशी धक्कादायक माहिती उपप्रादेशिक परिवहन विभागाकडील कागदपत्रांवरून उपलब्ध झाली.

भरपाईपासून वंचित

अपघात करणाऱ्या वाहनाचा वाहन मालकाने उतरविलेला नाही. या वाहनाखाली मयत झालेल्या नम्रता साळवी या महिलेला विमा मिळणे अवघड होणार आहे, असे एका जाणकाराने सांगितले.

आरटीओकडून कारवाई

कल्याण उपप्रादेशिक परिवहन विभागाचे उपप्रादेशिक परिवहन अधिकारी आशुतोष बारकुल यांना या अपघाताची माहिती मिळताच त्यांनी नियमबाह्यपणे चालविण्यात येणाऱ्या या डम्परच्या मालका विरूध्द मोटार वाहन कायद्याने कारवाई सुरू केली आहे. कल्याण, डोंबिवलीत दररोज अनेक डम्पर, सिमेंट मिक्सर धावतात. याशिवाय वस्तू घरपोच सेवा देणारी दुचाकी वाहने धावतात. या सर्व वाहनांची वाहतूक पोलीस, आरटीओने संयुक्त तपासणी करण्याची मागणी नागरिकांकडून करण्यात येत आहे.यामधील सर्वाधिक वाहने वाहन परवाना संपलेली, भंगारातील आहेत.