गुढीपाडव्यानिमित्त एकनाथ शिंदेंचा मोठा संकल्प; म्हणाले, “सोनं महाग झाले…”

गुढीपाडवा आणि हिंदू मराठी नववर्षानिमित्त ठाण्यातील श्रीकौपिनेश्वर सांस्कृतिक न्यास मंडळाच्या वतीने दरवर्षी शहरात स्वागत यात्रा काढली जाते. या स्वागत यात्रेत दरवर्षी उपमुख्यमंत्री एकनाथ शिंदे हे पायी सहभागी होत असतात. मुख्यमंत्री पदी विराजमन झाल्यावर देखील त्यांनी या परंपरेत कधी खंड पडू दिला नव्हता. यंदाही या स्वागत यात्रेत उपमुख्यमंत्री एकनाथ शिंदे यांनी उपस्थिती लावली होती.

कौपिनेश्वर मंदिरापासून ते जांभळी नाका चौकापर्यंत शिंदे यांनी पालखी घेतली. त्यानंतर,चिंतामणी चौकात क्रेनच्या माध्यमातून त्यांनी पालखीवर तसेच स्वागत यात्रेवर फुलांचा वर्षाव केला. त्यानंतर,चिंतामणी चौकापासून ते गोखलेरोडपर्यंत उपमुख्यमंत्री शिंदे पायी स्वागत यात्रेत सहभागी झाले. यावेळी त्यांनी काही चित्ररथांच्या सादरिकरण थांबून पाहिले आणि त्यांचे कौतूक केले. तसेच त्यांनी माध्यम प्रतिनिधींशी संवाद साधला.

सुरुवातीला त्यांनी माध्यमांच्या मार्फत सर्व जनतेला गुढी पाडवा आणि मराठी नूतन वर्षाच्या शुभेच्छा दिल्या. ‘दरवर्षी ठाण्यातून निघणाऱ्या या स्वागत यात्रेत ज्येष्ठांपासून ते अगदी लाडक्या बहीणी भाऊ लहान मुले सर्वजण उत्साहाने सहभागी होतात. या यात्रेत विविध सामाजिक संदेश देणारे चित्ररथ असतात. सर्वसमावेशक अशी ही स्वागत यात्रा दरवर्षी निघते,’ असे उपमुख्यमंत्री शिंदे म्हणाले.

पुढे ते म्हणाले की, ‘सोन महाग झाले असले तरी, नविन वर्षात महाराष्ट्रातील जनतेच्या आयुष्यात सोन्याचे दिवस आणण्याचा संकल्प आहे. या राज्याला विकासाकडे नेण्याचा संकल्प आहे. या राज्याला समृद्धीकडे नेण्याचा संकल्प आहे. महाराष्ट्र राज्याचा देशातून पहिला क्रमांक लागतो. त्यामुळे या राज्याचा विकास आणखी वेगाने करण्याचा आमचा संकल्प असल्याची भावना उपमुख्यमंत्री शिंदे यांनी व्यक्त केली.