नालासोपाऱ्यात मुसळधार पावसात वाहून गेलेल्या ४ जणांपैकी ३ जणांचे मृतदेह सापडले. तर एकाचा अद्याप शोध सुरू आहे. नालासोपारा येथील नेवाळे ते देसाईवाडी येथे जात असताना दोघेजण दुचाकीसह वाहून गेले आहेत. यापैकी संदीप जाधव याचा मृतदेह नेवाळे तलावात सापडला तर त्याच्या सहकाऱ्याचा शोध सुरू आहे. त्याची ओळखही पटलेली नाही. वसईच्या माणिकपूर तलावात मंगळवारी रात्री दोघे अॅक्टिव्हा गाडीसह वाहून गेले आहेत. आकाश राय (वय २५) तर राजेश भोसले (वय ३२) अशी दोघांची नावे आहेत. या दोघांचे मृतदेह सापडले आहेत. वसई-विरार, नालासोपाऱ्यात सायंकाळी पाऊस थांबला. नालासोपाऱ्यातील अनेक रस्ते, रेल्वे स्थानक परिसर पाण्याखालीच होते. सेंट्रल पार्क, तुलींज रस्त्यावर आताही गुडघाभर पाणी साचलेले आहे.
