कल्याण पश्चिम रेल्वे स्थानक परिसरातील फेरीवाल्यांना हटविण्याची कारवाई धूमधडाक्यात सुरू असली, तरी स्कायवॉकवरील फेरीवाले बिनधास्तपणे सकाळपासून रात्री उशिरापर्यंत प्रवाशांची ये-जा करण्याची जागा अडवून व्यवसाय करीत आहेत. फेरीवाले हे काही राजकीय, गुंड, प्रशासकीय व्यवस्थांच्या उपजीविकेचे साधन आहे. त्यामुळे ही मंडळी या फेरीवाल्यांना पाठबळ देऊन जबरदस्तीने व्यवसाय करण्यास भाग पाडतात, असे फेरीवाल्यांच्या चर्चेचून समजते. पालिकेच्या हद्दीत स्कायवॉक परिसर येतो. परंतु, फेरीवाला हटाव पथकाचे प्रमुख व त्यांचे सहकारी जोपर्यंत आयुक्तांकडे तक्रार जात नाही, तोपर्यंत आपले ‘दुकान’ सुरू ठेवतात. आयुक्तांनी आदेश दिले की, मग फेरीवाल्यांना हटविण्याच्या कारवाईचा देखावा करतात, असे काही कर्मचाऱ्यांनी सांगितले.
