लोकसत्ता प्रतिनिधी ठाणे : घोडबंदर येथील कासारवडवली भागात मेट्रो मार्गिकेवर तुळई बसविण्याचे काम हाती घेण्यात येणार आहे. या कामासाठी घोडबंदर मार्गावर वाहतूक बदल पोलिसांनी लागू केले असून यानुसार, ११ ऑगस्ट ते १ सप्टेंबर या कालावधीत रात्री १२ ते पहाटे ४ यावेळेत अवजड वाहनांना घोडबंदर मार्गावर प्रवेश बंदी असणार आहे. ही वाहतूक पर्यायी मार्गाने वळविण्यात आली आहे. घोडबंदर मार्गावरुन मोठ्याप्रमाणात अवजड वाहनांची वाहतूक सुरु असते. या मार्गावर मेट्रो मार्गिका ४ चे काम सुरु आहे. या कामामुळे घोडबंदर गायमुख घाटात वाहतूक कोंडी होत असते. या मेट्रो मार्गिका ४ चे नागलाबंदर सिग्नल ते इंडियन ऑईल पंप दरम्यान आय आणि यू आकारातील तुळई टाकण्याचे काम हाती घेण्यात आले आहे. या कामामुळे कोणताही अपघात घडू नये यासाठी वाहतूक पोलिसांनी घोडबंदर मार्गावर वाहतूक बदल लागू केले आहेत. आणखी वाचा-कसारा रेल्वे स्थानकात मोटरमन केबिनमध्ये चित्रफित तयार करणारे नाशिकचे दोन तरूण अटकेत या कामादरम्यान घोडबंदरकडे जाणाऱ्या सर्व जड अवजड वाहनांना पिलर क्रमांक ८५ जवळ प्रवेश बंदी असणार आहे. ही वाहने ठाणे वजनकाटा जवळून सेवारस्ता मार्गे पुढे इंडियन ऑईल पंपासमोर मुख्य रस्त्याने इच्छित स्थळी जातील. हे वाहतूक बदल ११ ऑगस्ट ते १ सप्टेंबर या कालावधीत रात्री १२ ते पहाटे ४ वाजेपर्यंत लागू राहतील, अशी माहिती वाहतूक विभागाकडून देण्यात आली.
