ठाणे : घरातील पाळीव प्राणी हा आपल्या कुटुंबातील अविभाज्य भाग होतो. त्याच्या निधनानंतर आपण केवळ त्याच्या आठवणी सांगत असतो. परंतु ठाण्यातील जाधव कुटुंबियाने त्यांच्या पाळीव श्वानाचे ठाण्यातील कौपिनेश्वर मंदिरात तिथीप्रमाणे वर्षश्राद्ध केले. जाधव कुटुंबियांना त्याचा इतका लळा लागला होता की, आठवणी सांगताना आजही हे कुटुंब भावूक होत आहेत. हेही वाचा >>> डोंबिवलीत तलावात बुडून बहिण भावाचा मृत्यू खोपट येथील दर्शन टाॅवर कुटुंबात किरण जाधव त्यांची पत्नी निता आणि मुलगा केतन हे राहतात. केतन हे लहान असताना त्यांनी श्वानासाठी हट्ट केला होता. त्यामुळे किरण यांनी १४ मे २००७ मध्ये त्यांच्या नातेवाईकांकडून दीड महिन्यांच्या श्वानाचे पिलू आणले होते. त्याचे नाव शिरो असे ठेवण्यात आले. हळू-हळू या श्वानाचा लळा जाधव कुटुंबियांना लागत गेला. दरवर्षी ३० मार्चला शिरोचे वाढदिवस साजरे केला जात होता. या वाढदिवसासाठी किरण हे त्यांच्या सर्व कुटुंबियांना बोलवत. किरण यांनी शिरोला स्वत:च्या मुलाप्रमाणे ‘शिरो किरण जाधव’ असे नाव दिले होते. त्यामुळे शिरो हा कुटुंबाचा सदस्य झाला होता. केतन यांनी त्यांच्या हातावरही शिरोचे नाव गोंदले आहे. दररोज जाधव कुटुंबिय शिरोला बाहेर फेरफटका मारण्यासाठी नेत असे. गेल्यावर्षी ७ जूनला शिरो याचे वृद्धापकाळाने निधन झाले. शिरोच्या निधनामुळे जाधव कुटुंबियाला अतीव दु:ख झाले होते. श्वानाचे आपण वर्षश्राद्ध करावे असा निर्णय जाधव कुटुंबाने घेतला होता. त्यामुळे रविवारी शिरो याचे तिथी प्रमाणे कौपिनेश्वर मंदिरात वर्षश्राद्ध ठेवण्यात आले होते. कौपिनेश्वर मंदिरात वर्षश्राद्ध शिरो आमच्या कुटुबांचा एक सदस्य झाला होता. शिरोच्या अनेक आठवणी आहेत. त्याच्या निधनानंतर आम्ही त्याचे वर्षश्राद्ध ठेवण्याचा निर्णय घेतला होता. त्यामुळे कौपिनेश्वर मंदिरात वर्षश्राद्ध झाले. - धनश्री सोहनी, केतन यांच्या मावशी.
