कल्याण पूर्वेतील दावडी परिसरातील फेरीवाल्यांवर कारवाई

कल्याण डोंबिवली पालिकेच्या आय प्रभागाने मागील दोन महिन्यांत आपल्या प्रभाग हद्दीतील मुख्य, अंतर्गत रस्त्यांवर, पदपथ अडवून बसणाऱ्या फेरीवाल्यांवर कारवाई करून फेरीवाल्यांचे आर्थिक कंबरडे मोडून त्यांचे बस्तान आपल्या प्रभागातून हटविण्यास भाग पाडले आहे.

(कल्याण पूर्व आय प्रभागात दावडी परिसरात फेरीवाल्यांवर पालिकेची कारवाई.) (लोकसत्ता टिम)

कल्याण – कल्याण डोंबिवली पालिकेच्या आय प्रभागाने मागील दोन महिन्यांत आपल्या प्रभाग हद्दीतील मुख्य, अंतर्गत रस्त्यांवर, पदपथ अडवून बसणाऱ्या फेरीवाल्यांवर कारवाई करून फेरीवाल्यांचे आर्थिक कंबरडे मोडून त्यांचे बस्तान आपल्या प्रभागातून हटविण्यास भाग पाडले आहे. तरीही फेरीवाले चोरून लपून बसत असल्याची कुणकुण लागल्यावर आय प्रभागाच्या अधिकारी, फेरीवाला हटाव पथकाने दावडी परिसरातील तुकाराम चौक दावडी ते स्मशानभूमी रस्त्यावरील फेरीवाल्यांवर अचानक कारवाई करून त्यांची दाणादाण उडवली. त्यांचे दोन टेम्पो सामान जप्त केले.

सतत दोन महिन्यांत फेरीवाल्यांवर कारवाई झाल्याने आय प्रभागातील दावडी भागात पालिका फेरीवाला हटाव पथक येणार नाही असा विचार करून फेरीवाल्यांनी दावडी परिसरातील रस्ते, पदपथांवर आपली दुकाने थाटली होती. नेहमीप्रमाणे आपल्या प्रभागात पाहणीसाठी फिरत असताना साहाय्यक आयुक्त डाॅ. सुनील लोंढे, अतिक्रमण नियंत्रण अधीक्षक राजेंद्र साळुंखे यांना दावडी भागात फेरीवाले बसत असल्याचे समजले. आपण आल्याची कुणकुण लागून न देता या दोन्ही अधिकाऱ्यांनी दुसऱ्याच दिवशी दावडी भागातील फेरीवाल्यांना हटविण्याचा निर्णय घेतला. फेरीवाल्यांना थोडाही सुगावा लागू न देता फेरीवाला पथकाला अचानक सोबत घेऊन दावडी भागात कूच केली.

या कारवाईत आय प्रभाग साहाय्यक आयुक्त डाॅ. सुनील लोंढे, अतिक्रमण नियंत्रण अधीक्षक राजेंद्र साळुंखे, फेरीवाला हटाव पथकप्रमुख स्वप्निल मोरे, दिनेश गायकर, घाटोळे, पाटील, सुरक्षा रक्षक स्वीटी शिंदे सहभागी झाले होते.

हेही वाचा

कल्याणच्या शिवाजी चौकात वाहन कोंडीला जबाबदार; कडोंमपा कर्मचाऱ्याला वाहतूक विभागाचा दंड

दावडी तुकाराम चौक भागात फेरीवाल्यांनी नुकतीच आपली दुकाने थाटली होती. पथक प्रमुख साळुंखे यांनी फेरीवाल्यांना पळून जाण्याची संधी न देता पथकाला आक्रमक पध्दतीने कारवाई करण्याच्या सूचना केल्या. यावेळी पथका सोबतच्या कमांडोंनी कोणीही फेरीवाला कारवाईच्या वेळी अडथळा आणणार नाही, दादागिरी करणार नाही याची काळजी घेतली होती. त्यामुळे फेरीवाला हटाव पथकाने रस्ते, पदपथावर दिसेल ती हातगाडी घणाच्या घावाने जागीच तोडून टाकली. काही लोखंडी हातगाड्या जागीच तोडणे शक्य नसल्याने त्या पथकाने जप्त करून पालिकेच्या भंगार वाहनतळावर नेल्या. फेरीवाल्यांचे सामान जप्त करण्यात आले.

पावसाळा सुरू झाल्याने अनेक दुकानदारांनी रस्ते, पदपथ अडवून निवारे उभारले होते. अशाप्रकारचे दुकानांसमोरील सर्व निवारे तोडून टाकण्यात आले. चिकन,मटणाची दुकाने आणि कोंबड्या ठेवण्याचे खुराडे यावेळी तोडून टाकण्यात आले. ही कारवाई सुरू झाल्यावर नागरिकांनी समाधान व्यक्त केले. या फेरीवाल्यांमुळे दररोज दावडी भागात वाहन कोंडी होत होती. नागरिक खरेदीसाठी अधिक संख्येने येत असल्याने चालायला या भागात जागा नसे, असे स्थानिकांनी सांगितले.

हेही वाचा

ठाण्यातील पदपथ बनले धोकादायक; वसंत विहारसह अनेक भागांत उघडी, तुटलेली गटार झाकणे

मागील दोन महिन्यांपासून आय प्रभाग हद्दीतील विविध रस्त्यांवर, पदपथांवर व्यवसाय करणाऱ्या फेरीवाल्यांवर कारवाई सुरू आहे. फेरीवाल्यांचे सामान जप्त केले जात आहे. तरीही दावडी भागात फेरीवाले बसत असल्याच्या तक्रारी प्राप्त झाल्याने ही कारवाई करण्यात आली. पाऊस सुरू झाला तरीही फेरीवाल्यांवरील कारवाई सुरूच राहणार आहे.-राजेंद्र साळुंखे अधीक्षक, आय प्रभाग.