कल्याण पूर्वेत मलंग रोडवर तुटलेले भुयारी गटाराचे झाकण वाहन कोंडीला कारण…अपघाताची भीती

कल्याण पूर्वेतील तिसगाव, चक्कीनाका, मलंग रोड हा सर्वाधिक वर्दळीचा रस्ता आहे. या भागातून मलंग रोड, बदलापूर, काटई, ठाणे, तळोजा नवी मुंबई दिशेने वाहने धावतात. याशिवाय स्थानिक रहिवासी, व्यापारी यांचीही वाहने धावत असतात.

मलंग रोडवर जिया वाईन वाईन्स दुकानासमोर मागील काही महिन्यांपासून अवजड वाहनाचा भार पडून एक भुयारी गटार योजनेवरील झाकण तुटले आहे. या झाकणामुळे आपल्या वाहनाचा टायर या तुटलेल्या झाकणात अडकेल या भीतीने वाहन चालक आपली वाहने या झाकणापासून दूर अंतरावरून वळसा घेऊन मग पुढे जात आहेत. या वळशामुळे या भागात वाहन कोंडी होते. दिवसा हे तुटलेले झाकण दूरवरून दिसते. रात्रीच्या वेळेत या भागात अंधार असल्याने अनेक वाहने या झाकणाच्या भागात जोरात आदळत आहेत. नवखा दुचाकी स्वार असेल तर त्याच्या दुचाकीची चाके या तुटलेल्या झाकण भागात अडकून अपघात होण्याची शक्यता आहे.

स्थानिक रहिवाशांनी यासंदर्भात पालिकेच्या मल, जलनिस्सारण विभागात संपर्क करून तक्रारी केल्या आहेत. त्याची दखल घेतली जात नाही, असे स्थानिक रहिवाशांनी सांगितले. स्थानिक रिक्षा चालक, वाहन चालक यांना या तुटलेल्या झाकणाची माहिती आहे. त्यामुळे ते तुटलेल्या झाकणाचा भाग आला की आपली रिक्षा, दुचाकी, मोटार बाजुला घेऊन मग पुढे जातात. नवख्या वाहन चालकांना याची माहिती नसते. ते तुटलेले झाकण आले की मग, आपले वाहन वळून पुढे जाण्याचा प्रयत्न करतात. त्यामुळे या भागात वाहन कोंडी होते.

या भागातील तुटलेल्या झाकणामुळे निर्माण झालेली कोंडी सोडविण्यासाठी कोळसेवाडी वाहतूक विभागाचे पोलीस सकाळ, संध्याकाळ तैनात असतात. गेल्या आठवड्यात याच भागात या भागातील वाहन कोंडी सोडवित असताना एका वाहतूक पोलिसाला एका मोटार कार चालकाने धमकावून मारण्याची धमकी दिली. त्यामुळे या तुटलेल्या झाकणामुळे प्रवासी, वाहतूक पोलीस यांच्यात या भागात किरकोळ कारणावरून वाद होत आहेत.

पालिकेच्या एका अधिकाऱ्याने सांगितले, मलंग रोड भागात एका भुयारी गटार योजनेचे झाकण तुटल्याची माहिती मिळाली आहे. तेथे तातडीने झाकण बसविण्याची आणि तो भाग सुस्थितीत करण्यात येत आहे.