कल्याण रामबागमध्ये मुलाचा खून करणाऱ्या वडिलांना जन्मठेप

(९) या मुलाचा जागीच मृत्यू झाला होता. पत्नी मीना, इतर तीन मुले सुजित, शुभम (५), सर्वेश (अडिच वर्ष) गंभीर जखमी झाले होते. याप्रकरणात कल्याण जिल्हा व सत्र न्यायालयाचे न्यायाधिश एस. एस. इनामदार यांनी मारेकरी वडील सुनील सदाशिव पाताडे (४६) याला जन्मठेपेची शिक्षा सुनावली.

सुनील सदाशिव पाताडे (४६) असे जन्मठेपेची शिक्षा झालेल्या आरोपीचे नाव आहे. न्यायालयाने त्याला पाच हजार रूपये दंड ठोठावला आहे. दंड न भरल्यास तीन महिने कारावासाची शिक्षा ठोठावली आहे. मार्च २०१३ मध्ये ही खुनाची घटना घडली होती. साडे बारा वर्षानंतर या गुन्ह्याचा निकाल लागला आहे.

याप्रकरणी महात्मा फुले पोलीस ठाण्यात गंभीर जखमी पत्नीच्या तक्रारीवरून पोलिसांनी गुन्हा दाखल होता. महात्मा फुले पोलीस ठाण्याचे वरिष्ठ पोलीस निरीक्षक बळीरामसिंग परदेशी, पोलीस निरीक्षक विजय नाईक, सोपान नागरे यांच्या मार्गदर्शनाखाली पोलीस निरीक्षक एस. के. धनवडे यांनी तपास करून कल्याण जिल्हा न्यायालयात आरोपपत्र दाखल केले होते. याप्रकरणात आरोपी सुनील पाताडे याला अटक करण्यात आली होती. याप्रकरणात सरकार पक्षातर्फे सरकारी वकील ॲड. संजय गोसावी, ॲड. जयश्री भटेजा, आरोपीतर्फे टी. ए. देवरे यांनी काम पाहिले. न्यायालय आणि पोलीस ठाणे समन्वयक म्हणून पोलीस उपनिरीक्षक आर. डी. आटपाटकर, हवालदार संंजय शेलार, भालचंद्र पवार, जयश्री झोळेकर यांनी काम पाहिले.

कुटुंबप्रमुख सुनील पाताडे याने पत्नीच्या चारित्र्यावर संशय घेऊन मार्च २०१३ मध्ये मध्यरात्रीच्या सुमारास पत्नीशी भांडण उकरून काढून रागाच्या भरात पत्नी आणि इतर चार अल्पवयीन मुलांंवर धारदार पात्याने हल्ला करून त्यांना गंभीर जखमी केले होते. या हल्ल्यात प्रणव उर्फ देवेश (९) याचा जागीच मृत्यू झाला होता. पत्नी आणि इतर तीन मुले गंभीर जखमी झाली होती. महात्मा फुले पोलीस ठाण्याच्या पोलिसांनी आरोपी सुनीलला अटक केली होती.

न्यायालयात आरोपपत्र दाखल झाल्यानंतर सरकारी वकील ॲड. संजय गोसावी यांनी या गुन्ह्यातील सबळ पुरावे न्यायालयासमोर सादर करून आरोपी सुनील या घटनेला प्रत्यक्ष कसा जबाबदार आहे हे न्यायालयाला साक्षी पुराव्याने पटवून दिले. आरोपीच्या वकिलांनी या गुन्ह्यात प्रत्यक्ष साक्षीदार नसल्याचे आणि साक्षीत आणि घटनेत सातत्य नसल्याचे सांगून सरकार पक्षाचे म्हणणे खोडून काढण्याचा प्रयत्न केला. न्यायालयाने या घटनेचा पंचनामा, साक्षीदार आणि एकूण घटनाक्रमाचा विचार करून सबळ पुराव्यांचा विचार करून या गुन्ह्याला सुनील पाताडे हाच जबाबदार असल्याचा ठपका ठेवत त्याला जन्मठेपेची शिक्षा ठोठावली.