कल्याण-शीळफाटा मार्गावरील वाहतूक कोंडी विरोधात मनसेचे आंदोलन

कल्याण-शीळफाटा हा कल्याण-डोंबिवली परिसराला ठाणे, नवी मुंबई, तळोजा, पनवेल आणि मुंबई महानगर प्रदेशातील विविध भागांशी जोडणारा अत्यंत महत्त्वाचा मार्ग आहे. या मार्गावरून दररोज मोठ्या प्रमाणात खासगी वाहने, एसटी बस, शालेय वाहने, मालवाहू वाहने तसेच अवजड वाहतूक सुरू असते. त्यामुळे या मार्गावरील वाहतूक सुरळीत असणे हे केवळ कल्याण-डोंबिवलीतील नागरिकांसाठी नव्हे, तर संपूर्ण परिसरातील दळणवळणासाठी महत्त्वाचे आहे. शीळफाटा आणि कल्याण फाटा परिसरातील वाहतूक कोंडीचा परिणाम मुंब्रा, कल्याण, डोंबिवलीसह नवी मुंबईच्या दिशेने होणाऱ्या वाहतुकीवरही होतो.

तर या मार्गावर प्रवास करणाऱ्या नागरिकांना दररोज वाहतूक कोंडीचा सामना करावा लागत आहे. काटई नाका, पलावा, निळजे, मानपाडा, कल्याण फाटा आणि शीळफाटा या परिसरातील प्रमुख चौकांमध्ये वाहतुकीचा ताण वाढत असून सकाळी आणि सायंकाळच्या गर्दीच्या वेळेत परिस्थिती अधिकच बिकट होत असल्याचे चित्र आहे. शाळकरी विद्यार्थी, पालक, नोकरदार, रुग्णवाहिका आणि सर्वसामान्य वाहनचालकांना याचा नियमित फटका बसतो.

रस्त्याच्या विविध भागांत सुरू असलेली विकासकामे आणि मेट्रोच्या कामामुळे काही ठिकाणी वाहतुकीसाठी उपलब्ध जागा कमी झाली आहे. परिणामी आधीच मोठ्या वाहनसंख्येचा भार असलेल्या या मार्गावर कोंडीची तीव्रता वाढत आहे. सप्टेंबरमध्ये मेट्रोच्या कामामुळे मुख्य रस्त्याचा मोठा भाग वाहतुकीसाठी बंद करून काही वाहतूक सर्व्हिस रोडकडे वळवण्यात आल्याने वाहनचालकांच्या अडचणी आणखी वाढल्याचे समोर आले होते. या मार्गावरील कोंडीचा प्रश्न केवळ एखाद्या चौकापुरता मर्यादित राहत नाही. एका ठिकाणी वाहतूक अडली की त्याचा परिणाम पुढील चौकांवर आणि जोडरस्त्यांवर होत जातो. त्यामुळे काही वेळातच कल्याण-शीळफाटा मार्गासह पलावा, काटई नाका, निळजे, मानपाडा आणि पुढे महापेच्या दिशेने जाणाऱ्या वाहतुकीवरही त्याचा परिणाम होतो. नुकतेच गणेश विसर्जनानंतर अवजड वाहनांची संख्या वाढल्याने कल्याण-शीळफाटा ते महापे मार्गावर मोठ्या प्रमाणात वाहतूक कोंडी झाली होती. या कोंडीमुळे वाहनांच्या लांबच लांब रांगा लागल्या होत्या.

दरम्यान, या मार्गावरील वाहतूक कोंडीचा कायमस्वरूपी प्रश्न सोडवण्यासाठी विविध पायाभूत सुविधा प्रकल्पांची कामे सुरू आहेत. शीळफाटा आणि कल्याण फाटा येथे उड्डाणपुलांच्या माध्यमातून वाहतुकीला पर्यायी मार्ग उपलब्ध करून देण्याचे नियोजन करण्यात आले आहे. एमएमआरडीएच्या प्रकल्प माहितीनुसार, शीळफाटा जंक्शनवरील उड्डाणपुलाची लांबी ७८६.५० मीटर, तर कल्याण फाटा येथील उड्डाणपुलाची लांबी २३९४.०४ मीटर असून या प्रकल्पांचा उद्देश या परिसरातील वाहतूक कोंडी कमी करणे हा आहे. याशिवाय ऐरोली-काटई नाका मार्गिकेच्या तिसऱ्या टप्प्यात एनएच-४ ते काटई नाका असा सुमारे ६.७१ किलोमीटरचा उन्नत मार्ग प्रस्तावित असून या मार्गिकेमुळे शीळफाटा आणि कल्याण फाटा परिसरातील विद्यमान वाहतूक अडथळ्यांना पर्याय उपलब्ध होणार आहे.

मात्र हे प्रकल्प पूर्ण होईपर्यंत दररोजच्या वाहतूक कोंडीचा त्रास सर्वसामान्य नागरिकांनीच सहन करायचा का, असा सवाल उपस्थित करत मनसेने आंदोलनाची हाक दिली आहे. रविवार, ११ ऑक्टोबर रोजी सकाळी ११ वाजता शीळफाटा (कल्याण फाटा) जंक्शन येथे हे आंदोलन करण्यात येणार आहे. या आंदोलनात नागरिकांनी मोठ्या संख्येने सहभागी व्हावे, असे आवाहन मनसेचे नेते तथा माजी आमदार राजू पाटील यांनी केले आहे. दररोजच्या प्रवासाचा वेळ वाहतूक कोंडीत वाया जाणे, इंधनाचा अतिरिक्त खर्च, शालेय विद्यार्थी व नोकरदार वर्गाची होणारी गैरसोय आणि आपत्कालीन सेवांनाही कोंडीचा बसणारा फटका या प्रश्नांकडे प्रशासनाचे लक्ष वेधून कल्याण-शीळफाटा मार्गावरील वाहतूक व्यवस्था अधिक सक्षम करण्याची मागणी या आंदोलनाच्या माध्यमातून करण्यात येणार आहे.