कल्याण डोंबिवली शहरातील २७० जुने धोकादायक पथदिव्यांचे खांब बदलले

कल्याण डोंबिवली पालिका क्षेत्रात दिवाबत्ती सोयीसाठी ३३ हजार ८७० पथदिव्यांचे खांब आणि ४१ हजार ९०७ वीज दिवे बसविण्यात आले आहेत. मागील चार ते पाच वर्षाच्या कालावधीत अपर शहर अभियंता प्रशांत भागवत आणि सहकाऱ्यांनी यामध्ये महत्वाची कामगिरी केली. शहराच्या महत्वाच्या वर्दळीच्या रस्त्यांवर सुशोभित विज दिवे लावण्याची संकल्पना भागवत यांनी यशस्वी करून दाखवली.

पालिकेच्या १० प्रभागातील पालिकेची नागरी आरोग्य केंद्रे, रुग्णालये, प्रभाग कार्यालये आहेत. या कार्यालयांमधील वायरिंग, वातानुकूलित यंत्रे, विद्युत जनरेटर दुरुस्तीची कामे यावेळी करण्यात आली. पावसाळा सुरू होण्यापूर्वी पथदिवे, दिवाबत्ती सोयीबाबत कोणत्याही तक्रारी येता कामा नयेत अशा सक्त सूचना आयुक्त अभिनव गोयल यांनी विद्युत विभागाला दिल्या आहेत. त्याप्रमाणे अपर शहर अभियंता भागवत यांच्या मार्गदर्शनाखाली कार्यकारी अभियंता जितेंद्र शिंदे आणि सहकाऱ्यांनी पालिकेच्या १० प्रभागांमध्ये जाऊन खराब विद्युत यंत्रणेची पाहणी केली. या पाहणीत प्रभागातील काही पथदिवे खांब खराब झाल्याचे समजल्यावर ते तातडीने दुरुस्त करण्याचे काम हाती घेण्यात आले आणि ते पाऊस सुरू होण्यापूर्वी पूर्ण करण्यात आले.

पावसाळ्यात चार महिने सक्रिय राहणाऱ्या आपत्ती विभागासाठी स्वतंत्र संवाद कक्ष संपर्क क्रमांकासह उपलब्ध करून देण्यात आला आहे. दुरुस्ती कामाच्यावेळी १९८ दुरुस्ती फिटिंग बॅक्रेट, १२ वितरण कंट्रोल पॅनल बदली करण्यात आले आहेत. पालिकेची दूरध्वनी आणि बिनतारी यंत्रणा पावसाळ्याच्या पार्श्वभूमीवर सुसज्ज ठेवण्यात आली आहे, असे कार्यकारी अभियंता जितेंद्र शिंदे यांनी सांगितले.