बदलापूरः किसन कथोरे यांना माझ्या वडिलांनी मोठी मदत केली होती. त्यांची राजकीय सुरूवात माझ्या वडिलांनी सुरू करून दिली. तसेच ते जिल्हा परिषद अध्यक्ष होण्यासाठी माझ्या वडिलांकडे येत होते, असे सांगत राष्ट्रवादी कॉंग्रेस शरद पवार पक्षाचे मुरबाडचे उमेदवार सुभाष पवार यांनी आमदार किसन कथोरे यांचा खरपूस समाचार घेतला. वडिलांना पाडले आहे तर मुलालाही पाडू असे वक्तव्य किसन कथोरे यांनी दोन दिवसांपूर्वी केले होते. त्यावर बोलताना शनिवारी पवार यांनी हे वक्तव्य केले. अरेरावीने बोलणे हे कथोरेंची ख्याती आहे, असेही पवार यावेळी म्हणाले.
आमदार किसन कथोरे यांनी महाविकास आघाडीतील राष्ट्रवादी कॉंग्रेस शरद पवार पक्षाचे उमेदवार सुभाष पवार यांच्यावर पहिल्या दिवसापासून थेट हल्लाबोल चढवला. त्यांना उमेदवारी जाहीर होताच त्यांनी मतदारसंघात ठेकेदार हवा का असा प्रश्न उपस्थित करत पवार यांना लक्ष्य केले होते. तर अर्ज भरण्याच्या दिवशी माजी आमदार गोटीराम पवार यांचा केलेल्या पराभवावर बोट ठेवत, वडिलांना पाडले तर मुलालाही पाडू असे वक्तव्य केले होते.
सुभाष पवार यांचे वडील गोटीराम पवार हे चार वेळा मुरबाड विधानसभा मतदारसंघात आमदार होते. सुरूवातीला कथोरे पवार यांच्याच नेतृत्वात स्थानिक पातळीवरच्या निवडणुका लढले होते. याच इतिहासाची आठवण करून देत सुभाष पवार यांनी शनिवारी कथोरे यांच्यावर टीकास्त्र सोडले. किसन कथोरे यांच्या राजकीय कारकिर्दीची सुरूवात वडिलांमुळेच झाली होती. जिल्हा परिषद अध्यक्ष पदासाठी ते वडिलांना भेटायला यायचे, असे सांगत त्यांनी कथोरे यांना वडिलांनी मोठी मदत केल्याचा पुनरूच्चार केला. तसेच अरेरावीणे बोलणे हा कथोरेंचा इतिहास आहे, असेही ते म्हणाले. बदलापूर शहरात माध्यमांशी बोलताना पवार यांनी कथोरेंचा समाचार घेतला. तसेच यावेळी बोलताना, शहरात अनेक प्रश्न असून वीज, वाहतूक प्रश्नांवर लोकप्रतिनिधींवर नागरिकांची मोठी नाराजी असल्याचेही पवार म्हणाले.
