ऐन होळीत कोकण रेल्वेचे वेळापत्रक साफ कोलमडले, शिंदे सेनेचा खासदार संतापला, केली चौकशीची मागणी

होळी, पालखी निमित्ताने मुंबई, ठाण्यासह उपनगरात राहणारे हजारो कोकणी बांधव कोकणात रेल्वे मार्गाने जात असतात. परंतु मागील काही दिवासांपासून कोकण रेल्वेच्या सर्वच गाड्यांचे अर्थात अप आणि डाऊन मार्गावरचे वेळापत्रक साफ कोलमडले आहे.

Konkan Railway train delay, Naresh Mhaske protest, Passenger inconvenience at railway station, Holi travel rush | कोकण रेल्वे विलंब, खासदार नरेश म्हस्के, प्रवाशांचे हाल, होळी रेल्वे गर्दी

ऐन होळीत कोकण रेल्वेचे वेळापत्रक साफ कोलमडले, शिंदे सेनेचा खासदार संतापला, केली चौकशीची मागणी ( AI Generated Image )

ठाणे : होळी, पालखी निमित्ताने मुंबई, ठाण्यासह उपनगरात राहणारे हजारो कोकणी बांधव कोकणात रेल्वे मार्गाने जात असतात. परंतु मागील काही दिवासांपासून कोकण रेल्वेच्या सर्वच गाड्यांचे अर्थात अप आणि डाऊन मार्गावरचे वेळापत्रक साफ कोलमडले आहे. सात तास, पाच तास विलंबाने गाड्या धावत आहेत. यामुळे प्रवाशांमध्ये प्रचंड संताप आणि नाराजीची लाट आहे. विलंबाने धावणाऱ्या रेल्वे गाड्यांमुळे लहान मुले, महिला, ज्येष्ठ नागरिकांना प्रचंड मानसिक आणि शारीरिक त्रास सहन करावा लागत आहे. त्यामुळे शिंदे गटाच्या खासदाराने संताप व्यक्त केला असून रेल्वे मंत्र्यांकडे या प्रकरणी चौकशीची मागणी करणारे पत्रच पाठविले आहे.

मुंबई शहर, मुंबई उपनगरे, नवी मुंबई, पनवेल, ठाणे, दिवा, कल्याण, डोंबिवली, बदलापूर भागात कोकणी बांधव वास्तव्यास आहेत. होळी, पालखी निमित्ताने हजारो नागरिक रस्ते आणि रेल्वे मार्गे त्यांचे गाव गाठतात. परंतु दरवर्षी गर्दी आणि रेल्वे वाहतुकीचे बिघडलेले वेळापत्रक यामुळे कोकणी नागरिक त्रस्त होतो. असाच प्रकार यावर्षी घडला असून मागील काही दिवसांपासून कोकणात जाणाऱ्या आणि तेथून येणाऱ्या रेल्वेगाड्यांचे वेळापत्रक तब्बल पाच ते सात तास विलंबाने आहे. अनेकांना वेळेत गावी पोहचता येत नाही. त्यामुळे कोकणातील रहिवाशांकडून संताप व्यक्त केला जात आहे.

खासदाराचा संताप.. – ठाण्यातील शिंदे गटाचे खासदार नरेश म्हस्के यांनी रेल्वे मंत्री अश्विनी वैष्णव आणि कोकण रेल्वेच्या अध्यक्षांनाच पत्र लिहीले. पत्रात नमूद केले आहे की, कोकण रेल्वे मार्गावर धावणाऱ्या बहुतांश प्रमुख गाड्या या निर्धारित वेळेपेक्षा तासन्तास उशिराने धावत असून ही बाब आता अपवाद नसून रोजचीच समस्या बनली आहे. या सततच्या विलंबामुळे प्रवाशांच्या वैयक्तिक तसेच व्यावसायिक आयुष्यावर गंभीर परिणाम होत असून मानसिक व शारीरिक त्रास सहन करावा लागत आहे. दिनांक १ मार्च २०२६ रोजीचे उदाहरण देताना त्यांनी सांगितले की, प्रीमियम समजली जाणारी सुपरफास्ट तेजस एक्स्प्रेस 22119 ही गाडी सुमारे सात तास उशिराने धावत होती. तिकिटात जेवणाचा समावेश असून सुद्धा प्रवाशांना जेवण मिळालेले नाही. जेव्हा तेजससारख्या प्रतिष्ठित गाडीची ही अवस्था असेल, तर इतर एक्सप्रेस व प्रवासी गाड्यांची स्थिती किती बिकट असेल याची कल्पना करता येणे कठीण असल्याचे त्यांनी पत्रात नमूद केले आहे.

कोकण रेल्वे मार्गावर सुरू असलेल्या सातत्यपूर्ण अनियमिततेमुळे कोकणात सणासुदीच्या काळात जाणाऱ्या प्रवाशांचे प्रचंड हाल होत आहेत. या मार्गावरील जवळपास सर्वच प्रमुख गाड्या नियमितपणे तासन्‌तास उशिराने धावत असून ही परिस्थिती आता अपवाद न राहता नियमच बनली आहे. रोजच्या या विलंबामुळे… pic.twitter.com/mGbQoK5BGW
— Naresh Mhaske (@nareshmhaske) March 2, 2026

हेही वाचा

दुबईत अडकलेल्या १६४ मराठी बांधवांना मायदेशी आणण्यासाठी एकनाथ शिंदेंचे ” ऑपरेशन सुरक्षित प्रवास “

गाड्यांच्या विलंबनाबाबतची एसएमएस सूचना प्रणाली पूर्णपणे अविश्वसनीय ठरत असल्याची तक्रारही त्यांनी केली आहे. अनेक प्रवाशांना वेळेवर कोणतीही माहिती न मिळाल्याने त्यांना रेल्वे स्थानकांवर तासन्तास प्रतीक्षा करावी लागत असल्याचे त्यांनी निदर्शनास आणले आहे.

होळी, पालखी त्यांनतर मे महिन्याची सुट्टी आणि येणाऱ्या सण उत्सवानिमित्त लाखो कोकणवासी रेल्वेने आपल्या गावी जात असतो. कोकण रेल्वेचा प्रवास हा सुखकर आणि सुरक्षित असल्याची प्रवाशांची भावना आहे. रेल्वेमुळे प्रवासातील वेळेचीही बचत होत असते. त्यामुळे लाखो कोकणकर रेल्वे प्रवासाला प्राधान्य देत असतात. त्यामुळे प्रवाशांच्या भावनेचा आदर करून कोकण रेल्वे प्रशासनाने केवळ तात्पुरत्या उपाययोजनांवर न थांबता वेळेचे काटेकोर नियोजन प्रभावी करून तांत्रिक सुधारणेवर भर देऊन प्रवाशांना दिलासा द्यावा, अशी सूचना खासदार नरेश म्हस्के यांनी केली आहे.