land acquisition for samriddhi highway in thane district zws 70 | Loksatta

जमीन विभागल्याने शेतकरी अडचणीत ; समृद्धी महामार्गासाठी भूसंपादन, २० गुंठय़ांपेक्षा कमी क्षेत्राच्या वापराबाबत शेतकऱ्यांसमोर प्रश्न 

‘एमएसआरडीसी’ने बाधित शेतकऱ्यांची संपूर्ण जमीन ताब्यात घेऊन त्याचा मोबदला द्यावा अशी शेतकऱ्यांची मागणी होती.

जमीन विभागल्याने शेतकरी अडचणीत ; समृद्धी महामार्गासाठी भूसंपादन, २० गुंठय़ांपेक्षा कमी क्षेत्राच्या वापराबाबत शेतकऱ्यांसमोर प्रश्न 
समृद्धी महामार्गाचे शहापूर तालुक्यात शेलवली-कासगाव भागात सुरू असलेले काम.

भगवान मंडलिक, लोकसत्ता

कल्याण : मुंबई-नागपूर समृद्धी महामार्गासाठी आवश्यक असलेल्या ठाणे जिल्ह्यातील कल्याण, भिवंडी, शहापूर तालुक्यातील अनेक शेतकऱ्यांच्या जमिनीचे महाराष्ट्र राज्य रस्ते विकास महामंडळाने भूसंपादन करून शेतकऱ्यांना मोबदला दिला. परंतु, अनेक शेतकऱ्यांच्या जमिनीचे महामार्गात दोन तुकडे झाले आहेत. महामार्गासाठी आवश्यक जमिनी एमएसआरडीसीने ताब्यात घेऊन उर्वरित तुकडे आम्ही ताब्यात घेणार नाही आणि त्यांचा आम्हाला काही लाभ नसल्याने आम्ही त्याचा मोबदला देणार नाही अशी भूमिका महामंडळाने घेतल्याने शेतकऱ्यांची डोकेदुखी वाढली आहे.

ठाणे जिल्ह्यातील कल्याण, भिवंडी, शहापूर पट्टय़ात महामार्गामुळे जमिनीचे २० गुंठय़ापेक्षा कमी क्षेत्राचे तुकडे झालेले २३५ शेतकरी आहेत. समृद्धी महामार्गासाठी महामंडळाला नाशिक आणि त्यापुढील भागात शेतकऱ्यांकडून जमिनीचे सलग पट्टे उपलब्ध झाले. ठाणे जिल्ह्यात भात शेती, जमिनीच्या भाऊबंदकीत वाटण्या झाल्या असल्याने जमिनीचे गुंठेवारी मध्ये तुकडे झाले आहेत.

अनेक शेतकऱ्यांची ही गुंठेवारीतील जमीन समृद्धी महामार्गात गेली. या मधील जमिनीचा काही भाग महामार्गाने बाधित होत आहे. त्याच्या लगतचा भाग महामंडळाला आवश्यक नसल्याने महामंडळाने त्याचा ताबा शेतकऱ्यांकडे ठेवला आहे. या जमिनीच्या टीचभर तुकडय़ाचे आम्ही करू काय असा प्रश्न करून बाधित शेतकऱ्यांनी या जमिनी महामंडळाने ताब्यात घेऊन त्याचा मोबदला आम्हाला द्यावा अशी मागणी केली आहे.

आवश्यक जमीन ताब्यात मिळाल्याने महामंडळाने आता उर्वरित जमिनीच्या तुकडय़ावरून हात वर केले आहेत. मोक्याच्या ठिकाणी असलेल्या या तुकडा जमिनीचे करायचे काय असा प्रश्न शेतकऱ्यांसमोर आहे, असे कल्याण, भिवंडी, शहापूर भागातील बाधित शेतकऱ्यांनी सांगितले.

एमएसआरडीसीचे म्हणणे..

‘एमएसआरडीसी’ने बाधित शेतकऱ्यांची संपूर्ण जमीन ताब्यात घेऊन त्याचा मोबदला द्यावा अशी शेतकऱ्यांची मागणी होती. महामार्गामुळे जमिनीचे तुकडे झालेले भिवंडी ते नागपूर ७५० किमीच्या पट्टय़ात १३ जिल्ह्यांमध्ये अठराशे शेतकरी आहेत. हे तुकडे खरेदी करण्याचा निर्णय घेतला तर ‘एमएसआरडीसी’वर सुमारे चौदाशे कोटीचा बोजा पडेल, अशी माहिती एका उच्चपदस्थाने दिली. हे तुकडे महामार्ग किंवा महामंडळाच्याही कामाचे नसल्याने हे तुकडे ताब्यात न घेण्याचा निर्णय महामंडळाने घेतला आहे.

शेतकऱ्यांचे म्हणणे..

शासन महसूल नियमान्वये २० गुंठय़ापेक्षा कमी असलेल्या क्षेत्राचा नवीन तुकडा करता येत नाही. तुकडेबंदी अधिनियमाने या क्षेत्राचे खरेदीखत होत नाही. जमिनीचा लहानसा तुकडा हा महामार्गालगत असल्याने तेथे जाण्यासाठी महामार्गामुळे पोहच रस्ता नाही. या तुकडय़ांमध्ये नवीन बांधकाम करता येणार नाही किंवा ही जमीन लागवडी खाली आणणे शक्य होणार नाही, असे कल्याण तालुक्यातील शेतकऱ्यांनी सांगितले. जमीन तुकडय़ात असल्याने ती कोणी खरेदी करणार नाही, अशी कोंडी शेतकऱ्यांची झाली आहे.

समृद्धी महामार्गासाठी आवश्यक जमीन ताब्यात घेण्यात आली आहे. काही ठिकाणी शेतकऱ्यांच्या जमिनीचे तुकडे झाले. ते तुकडे महामंडळ किंवा महामार्गासाठी आता कामाचे नाहीत. त्यामुळे तुर्तास त्याविषयी कोणताही निर्णय घेण्यात आलेला नाही. – बापूसाहेब साळुंखे अधीक्षक अभियंता एमएसआरडीसी

मराठीतील सर्व ठाणे ( Thane ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Next Story
बदलापूर शहरात हिवसाळय़ाचा अनुभव ; पुणे, नाशिकपेक्षा तापमानात घट; एकाच वेळी पाऊस आणि धुके

संबंधित बातम्या

कल्याणमध्ये अल्पवयीन मुलीवर अत्याचार करुन हत्या; अल्पवयीन तरुणाचे कृत्य
कल्याण-डोंबिवलीतील भूमाफियांनी शासनाचा २५०० कोटीचा महसूल बुडविला
कल्याण-मुरबाड मार्गावरील म्हारळ-कांबा महामार्गाचे काम संथगतीने; धुळीमुळे प्रवासी, रहिवासी हैराण
डहाणू जवळील भीषण अपघातात कल्याण मधील एकाच कुटुंबातील तीन जण ठार
विश्लेषण: ठाणे जिल्ह्यात बेकायदा बांधकामांचा सुळसुळाट कसा झाला? आशिर्वाद कुणाचा?

व्हिडिओ

ताज्या बातम्या
पुणे: पाणीटंचाईची उच्च न्यायालयाकडून गंभीर दखल; स्थानिक स्वराज्य संस्थांना १३ डिसेंबरपर्यंत प्रतिज्ञापत्र देण्याचे आदेश
राहुल, अय्यर, पंत एकाचवेळी खेळू शकतात? बांगलादेश दौऱ्याआधी माजी निवडसमिती सदस्याचे मोठे विधान
लाडक्या राहाला पहिल्यांदा भेटण्यासाठी तैमूर आतुर; ‘या’ दिवशी होणार भावा-बहिणीची भेट
IND vs BAN ODI: बांगलादेशला मोठा धक्का; तस्किन अहमद भारताविरुद्धच्या पहिल्या वनडेतून बाहेर
मुंबई: गुगलवर ट्रॅव्हल्स कंपनीचा क्रमांक शोधणे पडले महागात