गॅस सिलिंडर बाबत तक्रार आहे “या” क्रमांकावर करा कॉल ! ठाणे जिल्हा प्रशासनाकडून संपर्क क्रमांक जाहीर

ठाणे जिल्हा पुरवठा कार्यालय यांच्या वतीने जिल्हाधिकारी कार्यालयात आपत्ती व्यवस्थापन नियंत्रण कक्ष कार्यान्वित करण्यात आला आहे. नागरिक, प्रसारमाध्यमे, गॅस ग्राहक तसेच लोकप्रतिनिधी यांना गॅस पुरवठ्याबाबत कोणतीही अडचण, तक्रार किंवा शंका असल्यास या नियंत्रण कक्षाशी संपर्क साधता येणार आहे. यासाठी भ्रमणध्वनी क्रमांक जाहीर करण्यात आले आहे.

सध्या समाज माध्यमांवर तसेच काही ठिकाणी गॅस सिलेंडरची टंचाई निर्माण होणार असल्याच्या चर्चा सुरू झाल्याने अनेक नागरिक

गॅस सिलेंडरचे आगाऊ बुकिंग करत आहे. यामुळे वितरण व्यवस्थेवर अनावश्यक ताण निर्माण होण्याची शक्यता आहे. त्यामुळे नागरिकांनी घाबरून किंवा अफवांवर विश्वास ठेवून अतिरिक्त गॅस सिलेंडर बुक करू नये, असे आवाहन प्रशासनाने केले आहे.

दरम्यान, तेल कंपन्यांनी घरगुती एलपीजी गॅसचा पुरवठा राज्यात तसेच ठाणे जिल्ह्यात सुरळीत सुरू असल्याचे स्पष्ट केले आहे. सध्या पुरवठा साखळीत कोणताही अडथळा नसून आवश्यकतेनुसार गॅस सिलेंडर उपलब्ध करून दिले जात आहेत. त्यामुळे नागरिकांनी कोणतीही भीती बाळगण्याचे कारण नसल्याचे प्रशासनाने सांगितले आहे.

जागतिक स्तरावर सुरू असलेल्या घडामोडींच्या पार्श्वभूमीवर इंधन व घरगुती गॅस पुरवठ्यावर प्रशासनाकडून सतत लक्ष ठेवले जात आहे. कोणतीही अनियमितता होऊ नये, तसेच अत्यावश्यक सेवांना आणि नागरिकांना गॅसचा पुरवठा नियमितपणे मिळत राहावा यासाठी आवश्यक त्या सर्व उपाययोजना करण्यात आल्या आहेत, अशी माहिती जिल्हा प्रशासनाने दिली.

नागरिकांनी अफवांवर विश्वास न ठेवता अधिकृत माहितीवरच विश्वास ठेवावा आणि गॅस पुरवठ्याबाबत काही अडचण आल्यास तात्काळ प्रशासनाच्या हेल्पलाईन क्रमांकावर संपर्क साधावा, असे आवाहनही ठाणे जिल्हा प्रशासनाने केले आहे.