राज्यातील ४१ शेतकऱ्यांच्या युरोप शेती अभ्यास, दौऱ्याला युरो चलन दर वाढीचा फटका, वाढीव खर्चाचा बोजा उचलावा लागणार असल्याने शेतकरी चिंतेत

अगोदरच आम्ही स्वखर्चाची दोन लाख १८ हजार ९२५ रूपये जुळवाजुळव करून अभ्यास दौऱ्यासाठी पर्यटन कंपनीकडे भरणा केली. पुन्हा वाढीव २५ हजाराची रक्कम कुठून उभी करायची, असा प्रश्न दौऱ्यातील सहभागी शेतकऱ्यांना पडला आहे. चलन वाढीतील ही वाढीव रक्कम शासनाने परदेश शेती अभ्यास दौऱ्याच्या शिलकीतून खर्च करावी, अशी मागणी शहापूर तालुक्यातील चांग्याचापाडा येथील प्रगतीशील शेतकरी बबन हरणे आणि इतर सहभागी शेतकऱ्यांनी कृषीमंत्री दादा भरणे यांच्याकडे केली आहे.

शेती दौरा कशासाठी?

महाराष्ट्रातील प्रगतीशील, उपक्रमशील शेतकऱ्यांना परदेशातील शेतीची लागवड, नवीन तंत्रज्ञान, पशुपालन यांचा अभ्यास करून त्या तंत्रज्ञानाच्या पध्दतीने आपल्याकडे शेती करता यावी. यासाठी महाराष्ट्र शासनाकडून दरवर्षी परदेशात शेती अभ्यास दौरे आयोजित केले जातात. मागील तीन वर्ष हा दौरा रखडला. मागील वर्षी या परदेश शेती दौऱ्याला मुहूर्त मिळाला. शहापूर तालुक्यातून चांग्याचा पाडा येथील बबन हरणे, वांद्रे गावातील विष्णु म्हात्रे, कल्याण तालुक्यातील पोई येथील गुरूनाथ सांबरे यांचा दौऱ्यात सहभाग आहे.

वाढीव रक्कम मागणी

मागील वर्षी ऑगस्टपासून युरोप शेती दौऱ्याची प्रक्रिया सुरू झाली. ४१ शेतकरी, दोन कृषी अधिकारी यांचा पासपोर्ट, व्हिझा प्रक्रिया पूर्ण करण्यासाठी पाच महिन्याचा कालावधी गेला. आता युरोपातील युरो चलन दर जागतिक चलन व्यवहाराप्रमाणे वाढला आहे. त्यामुळे प्रती शेतकरी दौरा खर्चात २४ हजार ७२० रूपये वाढ झाली आहे. परकीय चलन दरवाढ फरकाची रक्कम शेतकऱ्यांनी येत्या ७ फेब्रुवारीपर्यंत पर्यटन कंपनीकडे भरणा करावी, असे पर्यटन कंपनीकडून सूचित करण्यात आले आहे. दौऱ्यातील सहभागी शेतकरी प्रगतीशील असले तरी अनेकांची आर्थिक परिस्थिती नाजूक आहे. काहींनी दौऱ्याला न जाण्याच्या हालचाली सुरू केल्या आहेत.

कृषी विभाग सूचना

ठाणे जिल्हा कृषी अधीक्षक रामेश्वर पाचे यांनी शहापूर, कल्याण येथील तालुका कृषी अधिकाऱ्यांना पत्र पाठवून दौऱ्यातील सहभागी तीन शेतकऱ्यांना चलनवाढ फरकाची वाढीव रक्कम भरणा करण्यासाठी, शेतकऱ्यांनी रक्कम भरणा करण्यास असहमती किंवा दौऱ्यातून माघार घेतल्यास तसे समंतीपत्र घेऊन कार्यवाही केली जाईल, असे कळविले आहे.

परदेश शेती अभ्यास दौरा शासकीय आहे. शेतकऱ्यांनी त्यांच्या हिश्श्याची रक्कम भरणा केली आहे. मग, परकीय चलन वाढीचा फरकाच्या रकमेचा बोजा शेतकऱ्यांवर न टाकता शासकीय दौरा निधीतून तो शासनाने भरणा करावा.- बबन हरणे, प्रगतीशील शेतकरी, शहापूर.