Forbes India 30 Under 30 : डोंबिवलीतील मकरंद नारकर यांची फोर्ब्स इंडियाच्या ‘३० ग्राऊंड ब्रेकर्स’मध्ये निवड…

पालकांनी आपल्या मुलांच्या अभ्यासबाबत केवळ पुस्तकी ज्ञान आणि सर्वोच्च गुण मिळविण्याच्या शर्यतीत अडकून न पडता, आपल्या मुलांमधील चित्रकलाविषयक गुण हेरून चित्रकलेच्या आवडीकडे आधुनिक दृष्टीकोनातून पाहावे आणि त्यांना या क्षेत्रातील उच्चस्थानी पोहचण्यासाठी साहाय्य करावे, असे आवाहन ग्राफिक डिझायनर मकरंद नारकर यांनी पालक, विद्यार्थ्यांना संदेश देताना केले आहे.

मकरंद नारकर यांना शालेय जीवनापासून चित्रकलेची आवड होती. ते कार्टुन्सची, वस्तुंची चित्रे घरात मन लावून काढत असत. त्यांची ही आवड पाहून त्यांच्या आई, वडिलांनी इयत्ता पाचवीत असताना मकरंद यांना ज्येष्ठ चित्रकार उन्मेष इनामदार यांच्या चित्रकला प्रशिक्षण वर्गात दाखल केले. तेथे विविधांगी चित्रकलेचे मार्गदर्शन मकरंद यांना मिळाले. निसर्गात जाऊन निसर्गचित्रण करणे, मुंबईत जाऊन ज्येष्ठ चित्रकारांची प्रदर्शने पाहणे, जे. जे. स्कुल ऑफ आर्टला भेट देऊन तिथे ज्येष्ठ चित्रकारांच्या चित्रांची विविधांगी नजरेतून पाहणी करणे, चित्रकलेच्या आंतरराष्ट्रीय स्पर्धांमध्ये भाग घेणे, अशा उपक्रमां मकरंद सहभागी झाले.

चित्रकलेच्या स्थानिक व राज्यस्तरीय स्पर्धांमध्ये मकरंद यांना अनेक पारितोषिके मिळाली. शंकर्स इंटरनॅशनल चिल्डरन्स कॉंपिटीशन या स्पर्धेत जगातील अनेक देशांतील मुलांच्या चित्रांतून मकरंद यांच्या चित्राला पारितोषिक मिळाले. चित्रकलेच्या शालेय स्तरांवरील रेखाकलेच्या दोन्ही परीक्षांमध्ये ते सर्वाेच्च मानकाचे मानकरी होते. लहान असतानाच मकरंद यांना चित्रकलेची आवड निर्माण झाली आणि याच क्षेत्रात जीवनप्रवास करण्याचे त्यांनी निश्चित केले. बारावीपर्यंतचे शिक्षण पूर्ण झाल्यावर मकरंद नारकर यांनी जे जे इन्स्टिट्यूट ऑफ अप्लाईड आर्टच्या प्रवेशाची तयारी केली.

सर जे जे इन्स्टिट्यूट ऑफ अप्लाईड आर्टमध्ये प्रवेश परीक्षेत उच्च स्थान प्राप्त करून त्यांनी प्रवेश मिळवला. तेथील प्राध्यापकांच्या मार्गदर्शनाखाली दरवर्षी उत्तम कामगिरी करून पदवीच्या शेवटच्या वर्षी मुंबई विद्यापीठात प्रथम क्रमांक मिळवला. चित्रकला क्षेत्रातील अनुभव गाठीशी ठेऊन मकरंद यांनी बूमरँग स्टुडिओ संस्थेची स्थापना डोंबिवलीत केली. बूमरँग स्टुडिओने कोल्डप्लेच्या सहकार्याने त्यांच्या म्युझिक ऑफ द स्फेयर्स कॉन्सर्ट वर्ल्ड टूर, इंडिया २०२५ साठी व्हिज्युअल ओळख निर्माण केली. यामुळे त्यांनी क्युरियस ब्लू एलिफंट पुरस्कार पटकावला.

नारकर हे २०२४ च्या पॅरालिम्पिकसाठी स्पष्टीकरणात्मक ऍनिमेशन व्हिडिओ तयार करणारे एकमेव भारतीय आहेत. भारताच्या ७९ व्या स्वातंत्र्यदिनासाठी गुगल डूडल तयार करण्यापर्यंत, ऍपल, नाईक आणि कोका- कोला सारखे जागतिक ब्रँड त्यांच्या क्लायंटच्या यादीत आहेत. स्टुडिओ बूमरँगचे वैशिष्ट्य म्हणजे जागतिक ब्रँडसाठी तयार केलेल्या त्यांच्या कथांमध्ये भारतीय लोककथांचा समावेश आहे.