कल्याण : सासरच्या मंडळींनी विवाहितेचा शारीरिक व मानसिक छळ करून तिला वेड लागले आहे, असा देखावा निर्माण केला. विवाहितेच्या चारित्र्यावर संशय घेऊन तिला घरात कोंडून ठेवले. या सगळ्या प्रकाराने आलेल्या नैराश्यातून बदलापूरमधील कात्रप भागातील एका विवाहितेने राहत्या घरात बुधवारी आत्महत्या केली. या प्रकरणात बदलापूर पोलिसांनी पती, दीर आणि सासरा यांना अटक केली आहे.
रोहित सतिश पवार (३०, पती), दीर धनंजय पवार (३६), सासरा सतिश पवार (६२), सासु सुजाता (६०), जाऊ प्रियंका धनंजय पवार (३५) अशी गुन्हा दाखल आरोपींची नावे आहेत. बेळगाव जिल्ह्यातील आथणी तालुक्यातील एका गावातील प्रमिला चंद्रकांत निकम (४६) यांनी याप्रकरणी बदलापूर पोलीस ठाण्यात तक्रार केली आहे. पोलिसांनी गुन्हा दाखल करून घेतला आहे.
हेही वाचा : बँक व्यवहारांवर निवडणूक विभागाची नजर ! जिल्हास्तरीय बँक समनव्ययकाची नियुक्ती
पोलिसांनी सांगितले, बेळगाव येथील तक्रारदार प्रमिला निकम यांची मुलगी सोनाली हिचे लग्न बदलापूर कात्रप भागातील रोहित पवार याच्या बरोबर झाले होते. लग्नानंतर सासरच्या मंडळींनी सोनाली हिचा हुंड्यासाठी छळ सुरू केला होता. पती रोहित याला अन्य ठिकाणी नोकरी लावायची आहे यासाठी पैसे हवे असल्याचे सांगून सासरच्या कुटुंबीयांनी सोनालीकडून तिचे सोन्याचे स्त्रीधन काढून घेतले. त्यानंतर सोनालीच्या चारित्र्यावर कुटुंबीयांनी संशय घेऊन तिचा शारीरिक व मानसिक छळ सुरू केला. सोनालीने घराबाहेर पडू नये आणि तिने माहेरी आई प्रमिला किंवा अन्य कोणाशी संपर्क करू नये म्हणून तिला घरातील खोलीत कोंडून ठेवण्यात आले. ती वेडी झाल्याच्या दृश्यध्वनी चित्रफिती तयार करून सासरच्या मंडळींनी त्या मयत सोनालीच्या आईला दाखविल्या.
या सगळ्या प्रकाराने नैराश्य आल्याने सोनाली पवार हिने बुधवारी राहत्या घरात आत्महत्या केली. ही माहिती समजताच सोनालीचे बेळगाव येथील कुटुंब बदलापूरमध्ये दाखल झाले. सासरच्या मंडळींनी केलेल्या छळामुळे सोनालीने आत्महत्या केल्याचा ठपका ठेवत सोनालीच्या आईने बदलापूर पोलीस ठाण्यात तक्रार केली आहे. वरिष्ठ पोलीस निरीक्षक किरण बालवडकर यांच्या मार्गदर्शनाखाली पोलीस उपनिरीक्षक पी. डी. अमृतकर तपास करत आहेत.
