ठाणे : उच्च न्यायालयाने बेकायदा बांधकामांच्या मुद्द्यावरून ताशेरे ओढल्यानंतर ठाणे महापालिका प्रशासनाने शहरातील बेकायदा बांधकामांविरोधात विशेष मोहिम हाती घेतली असून यामध्ये गेल्या पंधरा दिवसांत प्रभाग समितीच्या बीट निरिक्षकांच्या पाहाणीत आढळून आलेली १२४ बांधकामे जमीनदोस्त करण्यात आली आहेत. शीळ येथील १८ अनधिकृत इमारती पाडण्यात आल्या आहेत तर, याच भागातील आणखी तीन बेकायदा इमारती रिकाम्या करून पाडण्याची कारवाई पालिकेमार्फत सुरू आहे.
मुंब्रा येथील शीळ भागातील १७ बेकायदा इमारतींचे प्रकरण उच्च न्यायालयात दाखल झाले होते. या प्रकरणाच्या सुनावणीदरम्यान न्यायालयाने बेकायदा बांधकामांच्या मुद्द्यावरून पालिका प्रशासनाला फटकारले. तसेच शहरातील ना विकास क्षेत्र आणि हरित क्षेत्रातील बेकायदा बांधकामांवरही तातडीने कारवाई करण्याचे आदेश न्यायालयाने दिले होते. यानंतर ठाणे महापालिका आयुक्त सौरभ राव यांनी १७ बेकायदा इमारतींवर कारवाई सुरू केली होती.
या कारवाईदरम्यान, येथे आणखी चार बेकायदा इमारती आढळून आल्या होत्या. त्यांच्यावरही पालिकेने कारवाई सुरू केली आहे. त्याचबरोबर त्यांनी संपुर्ण शहरातील बेकायदा बांधकामांविरोधात विशेष मोहिम हाती घेतली असून त्यासाठी प्रभाग समितीनिहाय उपायुक्त दर्जाच्या अधिकाऱ्यांच्या नेतृत्त्वात विशेष पथके नेमली आहेत. या पथकांमार्फत १९ जूनपासून नियमितपणे अतिक्रमण विरोधी पथकाची कारवाई सुरू आहे.
या मोहिमेत प्रभाग समिती क्षेत्रात बीट निरीक्षकांनी नोंदलेली आणि सध्या सुरू असलेली अनधिकृत बांधकामे पाडण्यास प्राधान्य देण्यात आले आहे. त्याचबरोबर, अनधिकृत बांधकामांविषयी तक्रार आल्यास त्याची शाहनिशा करून ते बांधकामेही तोडण्यात येत आहे. या बांधकामांमध्ये वाढीव बांधकामांचा समावेश अधिक असल्याची माहिती उपायुक्त (अतिक्रमण विभाग) शंकर पाटोळे यांनी दिली.
१९ जून ते ३ जुलै या कालावधीत १२४ बांधकामे पाडण्यात आली आहेत. महापालिका क्षेत्रात अनधिकत चाळी, अनधिकृत बैठी बांधकामे, वाढीव शेड, वाढीव बांधकाम, आरसीसी इमारतीचे बांधकाम, अनधिकृत बंगले, नाल्यालगतचे बांधकाम, आरक्षित भूखंडावरील गोडावूनचे बांधकाम, अनधिकृत टर्फ या प्रकारच्या बांधकामांवर कारवाई करण्यात आली आहे. ही कारवाई नियमितपणे सुरू राहणार आहे. हरित क्षेत्रातील बांधकामांचा शोध घेऊन त्यावरही कारवाई सुरू आहे. तसेच, खाडी किनारा, अनधिकृत भरणी यावरही कारवाई करण्यात येत असल्याची माहिती उपायुक्त पाटोळे यांनी दिली.
मोहिमेची अमलबजावणी आणि प्रत्यक्ष कारवाई
या मोहिमेची अमलबजावणी आणि प्रत्यक्ष कारवाई यांचा दैनंदिन स्वरुपातील आढावा अतिरिक्त आयुक्त प्रशांत रोडे घेत आहेत. अतिक्रमण विरोधी कारवाईमध्ये उपायुक्त (परिमंडळ), सर्व सहाय्यक आयुक्त, कार्यकारी अभियंता, अतिक्रमण आणि बांधकाम विभागाचे अधिकारी आणि कर्मचारी सहभागी झाले. या कारवाईसाठी पोकलेन, जेसीबी, गॅस कटर, ट्रॅ्क्टर ब्रेकर, मनुष्यबळ यांचा वापर करण्यात येत आहे. पोलीस आणि महाराष्ट्र सुरक्षा बलाचे जवान यांच्या बंदोबस्तात ही कारवाई करण्यात येत आहे.
२१ इमारतींच्या निष्कासनाची कारवाई सुरू
शीळ येथील एम. के. कम्पाऊंड येथे उच्च न्यायालयाच्या आदेशानुसार एकूण २१ इमारतींच्या निष्कासनाची कारवाई सुरू आहे. त्यापैकी १८ इमारती पाडण्यात आल्या आहेत. उर्वरित इमारतींच्या निष्कासनाची कारवाई सुरू आहे. परिमंडळ उपायुक्त मनीष जोशी, उपायुक्त शंकर पाटोळे, सचिन सांगळे यांच्या उपस्थितीत ही कारवाई करण्यात आली.
कारवाईच्या आकडेवारीचा तक्ता
(१९ जून ते ०३ जुलैपर्यंतची आकडेवारी)
नौपाडा-कोपरी – १०
दिवा – २८
मुंब्रा – १५
कळवा – १२
उथळसर – ११
माजिवडा-मानपाडा – २०
वर्तक नगर – १४
लोकमान्य नगर – १०
वागळे इस्टेट – ०४
एकूण – १२४
