मुस्लिम धर्मीयांच्या ग्रंथाची पाने फाडून जाळली, मुस्लिम व्यक्तीविरोधात गुन्हा दाखल

भिवंडी येथील धामणकरनाका परिसरात ही घटना उघडकीस आली. या भागात एक ४५ वर्षीय व्यक्ती राहतो. २८ एप्रिलला मुस्लिम धर्मातील पवित्र ग्रंथ कुराण शरीफ या धार्मिक ग्रंथांची तो पाने फाडून फेकत असल्याचे येथील नागरिकांनी पाहिले. त्याच्या घरामध्ये नागरिक गेले असता, तो ग्रंथातील पाने फाडत असल्याचे आणि जाळत असल्याचे आढळून आले. त्याला विचारणा केली असता, तो उडवा-उडवीची उत्तरे देऊ लागला.

नागरिकांनी त्याला पकडण्याचा प्रयत्न केला. परंतु तो तेथून पळून गेला. अखेर तेथील एका रहिवाशाने त्याच्याविरोधात तक्रार दाखल केली. मुस्लिम धर्मीयांच्या धार्मिक भावना दुखावल्याप्रकरणी तसेच कुराण शरीफ ग्रंथाची नासधूस करुन मुस्लिम धर्माचा अपमान केल्याप्रकरणी तक्रार देण्यात आल्याचे म्हटले आहे. या तक्रारीनंतर नारपोली पोलीस ठाण्यात गुन्हा दाखल झाला आहे. आरोपी हा मुस्लिम धर्मीय असून याप्रकरणाचा तपास पोलिसांकड़ून सुरु आहे.