ठाण्यात उद्या मराठी ‘सेलिब्रिटी’ मैदानात भिडणार; प्रेसिडेंट कपमध्ये संजय जाधव आणि सौरभ गोखले यांचे संघ आमनेसामने

३१ मार्च रोजी मुख्यमंत्री एकनाथ शिंदे आणि अभिनेता सलमान खान यांच्या उपस्थितीत या स्पर्धेचे दिमाखदार उद्घाटन झाले होते. सध्या या स्पर्धेत विविध राज्यातील तब्बल १६ संघ या स्पर्धेत सहभागी झाले आहेत. या संघांमध्ये चुरशीचे सामने सुरू आहेत. तर टेनिस क्रिकेट चाहत्यांचाही या स्पर्धेला चांगला प्रतिसाद मिळतो आहे. तर येत्या ५ एप्रिल रोजी स्पर्धेतील उपांत्य आणि अंतिम सामने रंगतील.

एकीकडे हे सामने सुरू असताना आता याच स्पर्धेत मराठी सिने, मालिका क्षेत्रातील कलाकार मैदानात उतरणार आहेत. अभिनेते, अभिनेत्री, निर्माते, दिग्दर्शक, गायक असे सर्व कलाकार आता ”क्लॅश ऑफ सुपरस्टार्स” या संकल्पनेखाली मैदानात उतरणार आहेत. शनिवार, सायंकाळी सायंकाळी ५ वाजता हा सामना ठाण्यातील दादोजी कोंडदेव स्टेडियममध्ये रंगेल.

असे आहेत संघ

सौरभ गोखले संघ: कल्याणी जाधव, ऋतुराज फडके, माधव देवचके, शुभंकर तावडे, आदिश वैद्य, तेजस बर्वे, अमोल नाईक, महेश लिमये, सक्षम कुलकर्णी, मंगेश बोरगावकर, राजेश भोसले, देवेंद्र शेलार, अभिलाष चौधरी आणि तेजस नेरुरकर.

संजय जाधव संघ: संजना पाटील, हर्षद अतकरी, पृथ्वीक प्रताप, शशांक केतकर, सिद्धार्थ बोडके, ओमप्रकाश शिंदे, अभिनय बेर्डे, अक्षय केळकर, सुशांत शेलार, उमाकांत पाटील, विवेक सांगळे, रोहित शिवलकर, सुयश टिळक आणि विनय राऊत.

टेनिस क्रिकेट फॉरमॅटमध्ये होणाऱ्या या सामन्यात मराठी कलाकारांच्या माध्यमातून चौकार आणि षटकारांची आतिशबाजी पाहायला मिळणार आहे. आपल्या लाडक्या कलाकारांना प्रत्यक्ष मैदानावर खेळताना पाहण्याची संधी ठाणेकर क्रिकेटप्रेमींना मिळणार असून हे सर्व सामने क्रिकेट चाहत्यांसाठी मोफत आहेत. त्यामुळे क्रिकेट रसिकांनी आणि नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे.