RTE Admission 2026-27 : आरटीई लॉटरी जाहीर झाली; पण पालकांना मात्र १० एप्रिलला कळणार निकाल

बालकांचा मोफत व सक्तीच्या शिक्षणाचा अधिकार अधिनियम २००९ अंतर्गत आर्थिकदृष्ट्या दुर्बल व वंचित घटकांतील विद्यार्थ्यांना नामांकित खासगी शाळांमध्ये शिक्षणाची संधी उपलब्ध करून देण्यासाठी दरवर्षी आरटीई २५ टक्के प्रवेश प्रक्रिया राज्यभर ऑनलाईन पद्धतीने राबविली जाते. यंदाही ही आरटीई प्रवेश प्रक्रियेअंतर्गत अर्ज भरण्यास १७ फेब्रुवारी पासून सुरुवात झाली होती. अर्ज भरण्यासाठी पालकांना ३१ मार्च पर्यंत मुदत देण्यात आली होती.

त्यानुसार, १ लाख १४ हजार ८२६ जागांसाठी राज्यभरातून २ लाख ८९ हजार २८९ पालकांनी आपल्या पाल्याचे आरटीई प्रवेशासाठी ऑनलाइन अर्ज केले असून, या सर्व अर्जांमधून संगणकीय पद्धतीने पारदर्शक लाॅटरी काढण्यात आली आहे. निवड करण्यात आलेल्या विद्यार्थ्यांची यादी शुक्रवार,१० एप्रिल अधिकृत संकेतस्थळावर जाहीर करण्यात येणार आहे. त्यासह निवड झालेल्या विद्यार्थ्यांच्या पालकांना दुरध्वनी क्रमांकावर संंदेशाद्वारे (एसएमएस) कळविले जाणार आहे, अशी माहिती शिक्षण विभागाकडून दिली जात आहे.

निवड झाल्यानंतर काय करावे?

आरटीई प्रवेश प्रक्रियेत निवड झालेल्या विद्यार्थ्यांच्या पालकांनी संबंधित शाळेत निश्चित कालावधीत आवश्यक कागदपत्रांसह उपस्थित राहून प्रवेश प्रक्रिया पूर्ण करणे आवश्यक आहे. अन्यथा संबंधित जागा पुढील प्रतीक्षा यादीतील विद्यार्थ्यांना दिली जाणार आहे. ही प्रवेश प्रक्रिया १० एप्रिल ते २० एप्रिल या कालावधीत राबविली जाणार आहे, याची सर्व पालकांनी नोंद घ्यावी.
प्रवेशासाठी आवश्यक कागदपत्रे सोबत ठेवा…

• जन्म प्रमाणपत्र
• उत्पन्न प्रमाणपत्र
• रहिवासी प्रमाणपत्र
• जात प्रमाणपत्र (लागू असल्यास)

पालकांना आवाहन…

पालकांना शिक्षण विभागामार्फत आवाहन करण्यात आले आहे की, कोणत्याही अफवा, गैरसमज किंवा मध्यस्थांवर विश्वास न ठेवता केवळ अधिकृत संकेतस्थळ व शासकीय माध्यमांवरूनच माहिती घ्यावी. कोणत्याही प्रकारच्या फसवणुकीपासून सावध राहावे. आरटीई प्रवेश प्रक्रियेबाबत अधिक माहितीसाठी संबंधित महानगरपालिका शिक्षण विभाग / तालुका गटशिक्षणाधिकारी कार्यालय कार्यालयाशी संपर्क साधावा, असेही प्रशासनाच्या वतीने आवाहन करण्यात येत आहे.