संजय गांधी राष्ट्रीय उद्यान आणि तानसा अभयारण्यात प्राणी गणना; येऊरच्या जंगलात बिबट्या, ‘ट्री श्रू’चे दर्शन

यावेळी विविध पाणवठ्यावर बिबटया, चितळ, भेकर, रानडुक्कर,मुंगूस, सांबर, हनुमान लंगूर अशा ३४ वन्य जीवांची नोंद करण्यात आली. मागील वर्षी प्राणी गणनेच्या दिवशी ढगाळ वातावरण होते. त्यावेळी बिबट्या दिसला नव्हता. परंतु यंदाच्या प्राणी गणनेत बिबट्या आढळून आला. तर शहापूर येथील तानसा अभयारण्यातही अनेक प्राणी, पक्षी आणि सरपटणाऱ्या प्राण्यांची नोंद झाली. ही प्रगणना उपवनसंरक्षक राहुल गवई (वन्यजीव विभाग, ठाणे) आणि सहाय्यक वनसंरक्षक दत्तात्रेय मिसाळ यांच्या मार्गदर्शनाखाली पार पडली. साखरोली, केळीचे पाणी, बोरद्यायचे पाणी, आघई पाझर तलाव आणि वेडवहाळ वनमोरी नाला या पाणवठ्यांवर मचाण उभारून रात्री निरीक्षण करण्यात आले.

रात्री माकड, वानर, भेकर, चौसिंगा, साळिंदर, रानडुक्कर, मुंगूस, ससा, जंगली मांजर, उदमांजर, खार आणि उडणारी खार यांसारख्या प्राण्यांचे आवाज ऐकू आले. काही ठिकाणी त्यांच्या हालचाली दिसल्या. तर काही प्राणी दूरवरून प्रत्यक्ष नजरेस पडले. याशिवाय धामण, घोणस यांसारखे सर्प, तसेच पाल, सरडे, बेडूक आदी प्रजातींचीही नोंद झाली. चट्टेरी वन घुबड, टिपकेवाला पिंगळा, जंगली पिंगळा आणि गव्हाणी घुबड यांच्या हाका ऐकू आल्या, तर पहाटेच्या वेळी ब्लॅकबर्ड, नीलिमा, नीलमणी, सह्याद्रीचा सूर्यपक्षी, निळा सूर्यपक्षी, फुलटोचा, काळटोप हळद्या, पावशा, भृंगराज, मोर, सर्पगरुड, घार, सुतारपक्षी, सातभाई यांसारख्या पक्ष्यांचीही नोंद झाली.

येऊर, तुंगारेश्वर उत्तर आणि दक्षिण या परिक्षेत्रात एक बिबट्या, तीन चितळ, तीन भेकर, दोन सांबर, चार रानडुक्कर, तीन माकड, सात हनुमान लंगूर, तीन मुंगूस, चार वटवाघूळ, एक ट्री श्रू, दोन खार, एक उदमांजर असे ३४ तर तानसा अभयारण्यात १४ सस्तन प्राणी, सहा सरपटणारे प्राणी आणि ४१ पक्ष्यांची नोंद झाली.