करवली धबधब्यात पडून एकाचा मृत्यू

डेहणे (वरपडी) रविवारी सकाळी ११ वाजताच्या सुमारास २५ तरुणांचा समूह करवली धबधबा परिसरात गिर्यारोहण करत होता. यावेळी सोनू सिंग याचा तोल जाऊन तो खाली पडला. पाण्यातील टोकदार दगडावर डोके आपटल्याने त्याला गंभीर दुखापत झाली. त्यानंतर तो पाण्याच्या प्रवाहात वाहून जाऊ लागला. स्थानिक ग्रामस्थांनी तत्काळ पाण्यात उतरून त्याला बाहेर काढले. मात्र तोपर्यंत त्याचा मृत्यू झाला होता, असे किन्हवली पोलीस ठाण्याचे साहाय्यक पोलीस निरीक्षक नितीन खैरनार यांनी सांगितले.

दरम्यान, काही दिवसांपूर्वी चोंढे येथे पुराच्या पाण्यात वाहून जाऊन दोन पर्यटकांचा मृत्यू झाल्याची घटना घडली होती. तरीही पर्यटकांकडून निष्काळजीपणा होत असल्याची बाब पुन्हा एकदा समोर आली आहे. पावसाळ्यात धबधबे, नदी-नाले आणि बंधाऱ्यांवरील पाण्याचा प्रवाह क्षणाक्षणाला बदलत असल्याने अशा ठिकाणी जाणे अत्यंत धोकादायक ठरू शकते. प्रशासनाने अनेक ठिकाणी प्रवेशबंदीचे फलक, बॅरिकेड्स आणि इशारे लावले असतानाही काही पर्यटक चोरवाटांचा वापर करून धबधबा परिसरात प्रवेश करतात. अशा प्रकारचा निष्काळजीपणा जीवावर बेतू शकतो. त्यामुळे नागरिकांनी आणि पर्यटकांनी स्वतःच्या सुरक्षिततेला प्राधान्य देत धबधबे, नदी-नाले आणि बंधाऱ्यांमध्ये जाणे टाळावे तसेच प्रशासनाच्या सूचनांचे काटेकोरपणे पालन करावे, असे आवाहन शहापूरचे तहसीलदार परमेश्वर कासुळे यांनी केले आहे.