विजेच्या झटक्याने महिला सफाई कर्मचारीचा मृत्यू

नगरपंचायतीत सफाई कामगार म्हणून कार्यरत असलेल्या सुलोचना सातपुते या मनमिळाऊ, कर्तव्यदक्ष व प्रामाणिक कर्मचारी म्हणून परिचित होत्या. त्यांच्या आकस्मिक निधनामुळे परिसरात हळहळ व्यक्त होत आहे. मिळालेल्या माहितीनुसार, शुक्रवारी सकाळी त्या नेहमीप्रमाणे कामावर जाण्याची तयारी करीत होत्या. यावेळी घरातील लोखंडी कपाट उघडताच त्यांना अचानक विजेचा जोरदार झटका बसला.

हा प्रकार लक्षात येताच त्यांचे पती विजय सातपुते यांनी तातडीने घरातील मुख्य वीजपुरवठा बंद केला आणि सुलोचना यांना उपचारासाठी शहापूर उपजिल्हा रुग्णालयात दाखल केले. मात्र वैद्यकीय अधिकाऱ्यांनी तपासणीनंतर त्यांना मृत घोषित केले.

दरम्यान, लोखंडी कपाटाला विद्युतप्रवाह कसा आला आणि विजेचा झटका नेमका कशामुळे बसला याबाबत तपास सुरू असून शहापूर पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस करीत आहेत.