त्र्यंबकेश्वर येथील पहिने गावाच्या हद्दीतील नवरा नवरी हे दोनशे पन्नास फूटहून अधिक उंचीचे दोन सुळके कल्याण मधील सहा वर्षाच्या ग्रीहिता विचारे या मुलीने रॉक क्लाइंबिंग करत पार केले आहेत. नवरा नवरी सुळक्यावर अशा प्रकारचे साहस करणारी ग्रीहिता ही पहिलीच मुलगी आहे. तिच्या या साहसाला कल्याणच्या सह्याद्री रॉक एडवेंचर संस्थेचे मोलाचे सहकार्य मिळाले. हे साहस करताना तिने भारतीय पारंपरिक वेशातील नऊवारी साडी नेसली होती. नवरी सुळका २८० फूट उंच, नवरा सुळका २६० फूट उंच आहे. या सुळक्यांच्या बाजूला हनुमानाच्या जन्माचे अंजनेरी गाव आहे. याशिवाय इतर लहान-मोठे गड़, किल्ले येथे आहेत. पायथ्यापासून सुळक्यावर जाण्यासाठी निबिड जंगल, दगड धोंडे असा अडथळयाचा मार्ग आहे. ग्रीहिता हिने लक्ष्मणपाडा इथून सोमवारी सकाळी सहा वाजता सुळक्यावर चढण्यास सुरुवात केली. एक तासात तिने ही मोहीम फत्ते केली. तिच्यासोबत चढाईसाठी आवश्यक सामग्री देण्यात आली होती. प्रस्तरोहणासाठी तिच्याजवळ हेल्मेट, हरणेस, झुमर इतर आवश्यक साधने दिली होती. नवरी सुळक्यावरून तिने यशस्वीपणे रॉक क्लाइंबिंग करत नवरा-नवरी सुळक्यामधील दोन हजार फूट अंतर पार केले. नवरा नवरी सुळक्याच्या दरम्यान अशाप्रकारचे साहस करणारी ग्रीहिता ही पहिलीच मुलगी असल्याने तिचा पहीने गावच्या पोलीस पाटलांच्या हस्ते सत्कार करण्यात आला. सह्याद्री रॉक एडवेंचर संस्थेचे पवन घुगे दर्शन देशमुख रंजीत भोसले यांचे महत्वाचे सहकार्य आणि मार्गदर्शन ग्रिहिता विचारेला लाभले.