ठाणे जिल्ह्यातील तालुक्यांना दुष्काळी यादीत सामावेश करण्याची सत्ताधाऱ्यांचीच मागणी; ट्रिगर -१ च्या यादीत सामावेश नसल्याने अनेक शेतकऱ्यांमध्ये नाराजी

राज्यातील खरीप हंगाम २०२६ मधील पर्जन्यमान, पीकस्थिती आणि दुष्काळाच्या विविध निकषांचा विचार करून शासनाने २५ सप्टेंबरला राज्यातील २६५ तालुक्यांमध्ये ‘ट्रिगर-१’ लागू केला आहे. या तालुक्यांना दुष्काळी परिस्थितीत विविध सवलती आणि उपाययोजनांचा लाभ मिळण्याचा मार्ग मोकळा झाला आहे. मात्र, ठाणे जिल्ह्यातील एकाही तालुक्याचा या यादीत समावेश नसल्याने ग्रामीण भागातील शेतकऱ्यांमध्ये नाराजी व्यक्त होत आहे. ठाणे जिल्ह्याचे नागरीकरण झाले असले, तरी भिवंडी, शहापूर, मुरबाड, कल्याण आणि अंबरनाथ तालुक्यांच्या ग्रामीण भागात मोठ्या प्रमाणावर शेती केली जाते. या भागातील शेतकऱ्यांनाही पावसातील खंड आणि अनिश्चित पर्जन्यमानामुळे दुष्काळसदृश परिस्थितीचा सामना करावा लागत आहे. त्यामुळे या पाचही तालुक्यांतील परिस्थितीचा विचार करून तेथे दुष्काळ जाहीर करावा, अशी मागणी कपिल पाटील यांनी केली आहे.

शहापूर तालुक्यातील अनेक भागांत पावसाने मोठा खंड दिल्याने भात, नागली, वरी आणि कडधान्यांच्या उत्पादनावर परिणाम होण्याची शक्यता निर्माण झाली आहे. तालुक्यातील बहुतांश शेतकरी भातशेतीवर अवलंबून असल्याने उत्पादनात घट झाल्यास त्यांच्या आर्थिक अडचणी वाढू शकतात. त्याचबरोबर आगामी रब्बी हंगामासाठी पाण्याची उपलब्धता हा प्रश्नही गंभीर होण्याची शक्यता आहे. या पार्श्वभूमीवर शहापूर तालुक्यातील प्रत्यक्ष पर्जन्यमान, पीकस्थिती आणि शेतकऱ्यांची परिस्थिती लक्षात घेऊन तालुक्याचा ‘ट्रिगर-१’ दुष्काळी यादीत समावेश करावा आणि शेतकऱ्यांना शासनाच्या दुष्काळी सवलती व उपाययोजनांचा लाभ द्यावा, अशी मागणी पांडुरंग बरोरा यांनी केली आहे. यासंदर्भातील निवेदन मुख्यमंत्री देवेंद्र फडणवीस यांच्यासह कृषिमंत्री दत्तात्रय भरणे आणि ठाणे जिल्हाधिकाऱ्यांना देण्यात आले आहे. ठाणे जिल्ह्यातील ग्रामीण भागातील शेती आणि शेतकऱ्यांची परिस्थिती लक्षात घेऊन शासन या मागण्यांवर काय निर्णय घेते, याकडे आता शेतकऱ्यांचे लक्ष लागले आहे.