शहापूर : राज्य सरकारने खरीप हंगामातील पर्जन्यमान आणि पीकस्थितीच्या आधारे राज्यातील २६५ तालुक्यांमध्ये ‘ट्रिगर-१’ लागू केला आहे. मात्र, या यादीत ठाणे जिल्ह्यातील एकाही तालुक्याचा समावेश करण्यात आलेला नाही. जिल्ह्याचे मोठ्या प्रमाणावर नागरीकरण झाले असले, तरी ग्रामीण भागातील शेती आणि शेतकऱ्यांच्या प्रश्नांकडे दुर्लक्ष होत असल्याची भावना व्यक्त होत आहे.

पावसात पडलेला खंड आणि त्याचा पीक लागवडीवर झालेला परिणाम यामुळे शेतकरी चिंतेत आहेत. अशा परिस्थितीत ठाणे जिल्ह्यातील तालुक्यांचा ‘ट्रिगर-१’मध्ये समावेश न झाल्याने शेतकऱ्यांमध्ये नाराजी आहे. दरम्यान, ठाणे जिल्ह्यातील तालुक्यांचा दुष्काळी निकषांत समावेश करण्याची मागणी सत्ताधारी तसेच विरोधी पक्षातील नेत्यांकडूनही होत आहे.

ठाणे जिल्ह्यातील ग्रामीण भागात सर्वाधिक भाताचे पीक घेतले जाते. मुंबई, ठाणे शहरापासून ४० ते ५० किमीवर हे क्षेत्र येत असले तरीही अनेकजण आजही शेतीवर अवलंबून आहेत. परंतु पावसातील खंड, पीक लागवडीचे कमी झालेले प्रमाण यामुळे शेतकरी चिंतेत आहे. राज्यातील खरीप हंगामातील पर्जन्यमान, पीकस्थिती आणि दुष्काळाच्या विविध निकषांचा विचार करून शासनाने २५ सप्टेंबरला राज्यातील २६५ तालुक्यांमध्ये ‘ट्रिगर-१’ लागू केला आहे. या तालुक्यांना दुष्काळी परिस्थितीत विविध सवलती आणि उपाययोजनांचा लाभ मिळण्याचा मार्ग मोकळा झाला आहे. मात्र, ठाणे जिल्ह्यातील एकाही तालुक्याचा या यादीत समावेश नसल्याने शेतकऱ्यांमध्ये नाराजी आहे.

हेही वाचा

जिल्ह्याचे नागरीकरण झाले असले, तरी भिवंडी, शहापूर, मुरबाड, कल्याण आणि अंबरनाथ तालुक्यांच्या ग्रामीण भागात मोठ्या प्रमाणावर शेती केली जाते. या भागातील शेतकऱ्यांनाही पावसातील खंड आणि अनिश्चित पर्जन्यमानामुळे दुष्काळसदृश परिस्थितीचा सामना करावा लागत आहे. त्यामुळे या पाचही तालुक्यांतील परिस्थितीचा विचार करून तेथे दुष्काळ जाहीर करावा, अशी मागणी माजी केंद्रीय राज्यमंत्री तथा, भाजपचे नेते कपिल पाटील यांनी केली आहे. तर पावसातील खंडामुळे खरीप पिकांच्या उत्पादनावर परिणाम होण्याची शक्यता लक्षात घेऊन शहापूर तालुक्याचा ‘ट्रिगर-१’ दुष्काळी यादीत समावेश करावा, अशी मागणी माजी आमदार पांडुरंग महादू बरोरा यांनी मुख्यमंत्री देवेंद्र फडणवीस यांच्याकडे केली आहे.

उत्पादनावर परिणाम होण्याची शक्यता

शहापूर तालुक्यातील अनेक भागांत पावसाने मोठा खंड दिल्याने भात, नागली, वरी आणि कडधान्यांच्या उत्पादनावर परिणाम होण्याची शक्यता निर्माण झाली आहे. तालुक्यातील बहुतांश शेतकरी भातशेतीवर अवलंबून असल्याने उत्पादनात घट झाल्यास त्यांच्या आर्थिक अडचणी वाढू शकतात.

दुष्काळी सवलती व उपाययोजनांचा लाभ द्यावा

आगामी रब्बी हंगामासाठी पाण्याची उपलब्धता हा प्रश्नही गंभीर होण्याची शक्यता आहे. या पार्श्वभूमीवर शहापूर तालुक्यातील प्रत्यक्ष पर्जन्यमान, पीकस्थिती आणि शेतकऱ्यांची परिस्थिती लक्षात घेऊन तालुक्याचा ‘ट्रिगर-१’ दुष्काळी यादीत समावेश करावा आणि शेतकऱ्यांना शासनाच्या दुष्काळी सवलती व उपाययोजनांचा लाभ द्यावा, अशी मागणी पांडुरंग बरोरा यांनी केली आहे.

यासंदर्भातील निवेदन मुख्यमंत्री देवेंद्र फडणवीस यांच्यासह कृषिमंत्री दत्तात्रय भरणे आणि ठाणे जिल्हाधिकाऱ्यांना देण्यात आले आहे. तर शिवसेना (उद्धव बाळासाहेब ठाकरे) पक्षाचे माजी जिल्हा परिषद सदस्य कुलदीप धानके यांनीही शहापूर तालुका ‘ट्रिगर-एक’ दुष्काळग्रस्त जाहीर करण्याची मागणी तहसीलदार यांच्याकडे केली.