सरकारी नोकरीचे आमिष दाखवून ७० लाखांची फसवणूक

भिवंडीतील काल्हेर भागात राहणाऱ्या २८ वर्षीय तरूणाची महसूल व वन विभागात सरकारी नोकरी लावून देण्याचे आमिष दाखवत फसवणूक करण्यात आली. विश्वास संपादन करण्यासाठी आरोपीने मंत्रालयातील वरिष्ठ शासकीय अधिकाऱ्यांच्या नावाने बनावट नियुक्तीपत्रे, शिक्के व स्वाक्षऱ्या तयार करून सरकारी नोकरी मिळवून देण्याचे आश्वासन दिले. त्यासाठी ७० लाख रुपये घेत फसवणूक करण्यात आली. या प्रकरणी नारपोली पोलिस ठाण्यात दाखल झालेला गुन्हा पुढील तपासासाठी गुन्हे शाखा, घटक-२, भिवंडीकडे वर्ग करण्यात आला. तपासादरम्यान मुख्य आरोपी श्याम विठोबा सावंत हा फरार असल्याचे निष्पन्न झाले. तर डोंबिवली येथील जुगल कुमार लोढा आणि कल्याणमधील रवींद्र दयानिधी शेंडुज्या यांना अटक करण्यात आली. तपासात आरोपींकडून महसूल विभागातील वरिष्ठ अधिकाऱ्यांच्या नावाचे बनावट शिक्के व स्वाक्षऱ्या असलेली कागदपत्रे जप्त करण्यात आली आहेत.

या प्रकरणात आणखी नागरिकांची फसवणूक झाली आहे का, तसेच बनावट शिक्के व स्वाक्षऱ्या कोठून तयार करण्यात आल्या, याचा तपास सुरू आहे. पोलिसांनी दिलेल्या माहितीनुसार, मुख्य आरोपी श्याम सावंत याच्याविरुद्ध मुंबईतील विविध पोलिस ठाण्यांत फसवणूक, बनावट कागदपत्रे तयार करणे आदी स्वरूपाचे अनेक गुन्हे दाखल आहेत. अटक आरोपींवरही यापूर्वी विविध गुन्ह्यांची नोंद असल्याचे तपासात समोर आले आहे.

पोलीस आयुक्त आशुतोष डुंबरे, सहपोलीस आयुक्त डॉ. ज्ञानेश्वर चव्हाण, गुन्हे शाखेचे वरिष्ठ अधिकारी यांच्या मार्गदर्शनाखाली ही कारवाई करण्यात आली. सरकारी नोकरीचे आमिष दाखवून पैसे मागणाऱ्या व्यक्तींपासून सावध राहण्याचे आवाहन पोलिसांनी नागरिकांना केले असून, अशा प्रकारची माहिती मिळाल्यास तातडीने जवळच्या पोलिस ठाण्याशी संपर्क साधण्याचे आवाहन करण्यात आले आहे.