ठाण्यात ४ वर्षांच्या मुलावर डुकरांचा जीवघेणा हल्ला

गंभीर जखमी

ठाण्यात डुकरांच्या हल्ल्यात जखमी झालेला सूरज.

ठाण्यातील कळवा-खारेगाव येथील आतकोनेश्वर नगरात खेळणाऱ्या चार वर्षांच्या मुलावर डुकरांनी जीवघेणा हल्ला केला. एका महिलेच्या सतर्कतेमुळे या मुलाचा जीव वाचला. हा मुलगा गंभीर जखमी असून, त्याला कळवा येथील छत्रपती शिवाजी रुग्णालयात दाखल केले आहे. त्याची प्रकृती गंभीर असल्याचे नातेवाईकांनी सांगितले.

आतकोनेश्वर नगरात मोकाट डुकरांचा सुळसुळाट झाला आहे. परिसरात घराबाहेर खेळणाऱ्या सूरज चंडालिया या चार वर्षांच्या मुलावर मोकाट डुकरांनी जीवघेणा हल्ला केला. मुलगा जीव वाचवण्यासाठी ओरडू लागला. त्याच्या ओरडण्याचा आवाज एका महिलेने ऐकला. तिने मुलाकडे धाव घेतली. तिने हातातील बादली डुकरांच्या दिशेने फेकली. तसेच दगडही मारल्याने डुकरांनी तेथून पळ काढला. महिलेने डुकरांना पिटाळून लावल्याने मुलाचा जीव वाचला, अशी प्रतिक्रिया हल्ल्यात जखमी झालेल्या सूरजची आई लक्ष्मी चंडालिया हिने व्यक्त केली. डुकरांच्या हल्ल्यात जखमी झालेल्या सूरजला तातडीने कळवा येथील छत्रपती शिवाजी रुग्णालयात दाखल केले आहे. त्याची प्रकृती अद्यापही गंभीर आहे, असे नातेवाईकांनी सांगितले. दरम्यान, या घटनेमुळे मोकाट डुकरांचा बंदोबस्त न करणाऱ्या महापालिका प्रशासनाविरोधात स्थानिकांनी संताप व्यक्त केला आहे. पालिकेने मोकाट डुकरांचा बंदोबस्त करावा, अशी मागणी होत आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: Thane kalawa kharegaon pigs attack a four years old boy

ताज्या बातम्या