युद्धजन्य परिस्थितीचा फटका, आता गॅस सिलिंडरला पर्याय, प्रत्येक कुटुंबाला मिळणार ३ लिटर रॉकेल, वाचा सविस्तर…

केंद्र सरकारने जारी केलेल्या आदेशानुसार एलपीजीच्या संभाव्य तुटवड्यावर उपाय म्हणून रॉकेल वितरणास मंजुरी देण्यात आली आहे. महाराष्ट्र राज्यासाठी एकूण ३७ लाख ४४ हजार लिटर (३,७४४ किलो लिटर) रॉकेल मंजूर करण्यात आले असून त्यापैकी ४८ हजार लिटर (४८ किलो लिटर) साठा ठाणे जिल्ह्यासाठी राखीव ठेवण्यात आला आहे, अशी माहिती जिल्हाधिकारी डॉ. श्रीकृष्ण पांचाळ यांनी दिली.

पश्चिम आशियातील देशांमध्ये सुरु असलेल्या लष्करी संघर्ष आणि त्यामुळे विस्कळीत झालेली तेल वाहतूक याचे परिणाम आता जगातील विविध देशांमध्ये दिसू लागले आहेत. भारतात देखील इंधनाचा योग्य वापर करण्यासाठी सरकारकडून विविध उपायोजना राबविण्यात येत आहे. याच पार्श्वभूमीवर नागरिकांना आता रॉकेल वितरण करण्यात येणार आहे. ठाणे जिल्ह्यात पात्र कुटुंबांना प्रति कुटुंब ३ लिटर रॉकेल वितरित केले जाणार आहे.

जिल्हा प्रशासनाने दिलेल्या माहितीनुसार, या योजनेचा लाभ प्रामुख्याने अंत्योदय अन्न योजना आणि प्राधान्य कुटुंब शिधापत्रिकाधारकांना दिला जाणार आहे. मात्र रॉकेलच्या उपलब्धतेनुसार आणि स्थानिक मागणीचा विचार करून श्वेत शिधापत्रिकाधारकांनाही या योजनेचा लाभ देण्याचा निर्णय घेतला जाऊ शकतो. शिधापत्रिका नसलेल्या कुटुंबांनाही या योजनेतून वगळण्यात आलेले नाही. अशा कुटुंबांनी ग्रामपंचायतीचा रहिवासी दाखला सादर केल्यास त्यांनाही रॉकेल मिळू शकणार आहे. तसेच स्थलांतरित मजुरांना केंद्र किंवा राज्य शासनाचे वैध ओळखपत्र सादर करून या सुविधेचा लाभ घेता येईल.

प्रत्येक पात्र कुटुंबाला किंवा शिधापत्रिकेला ३ लिटर रॉकेल देण्यात येणार असून हे वितरण अधिकृत रास्त भाव धान्य दुकानदार आणि परवानाधारक किरकोळ रॉकेल विक्रेत्यांमार्फत केले जाणार आहे. ज्या गावांमध्ये रॉकेल विक्रेते उपलब्ध नाहीत, तेथील नागरिकांनी जवळच्या गावातून आपला कोटा मिळवावा, अशा सूचना प्रशासनाने दिल्या आहेत. ठाणे जिल्ह्यासाठी मंजूर करण्यात आलेल्या ४८ किलो लिटर रॉकेल साठ्याच्या वाहतुकीसाठी चार टँकरना परवानगी देण्यात आली आहे. मार्च आणि एप्रिल या कालावधीत तालुकानिहाय मागणीनुसार रॉकेल वितरण करण्यात येणार आहे. दरम्यान, रॉकेलच्या विक्री दराबाबतचे स्वतंत्र आदेश शासन स्तरावरून लवकरच जाहीर करण्यात केले जातील, असेही जिल्हाधिकारी डॉ. श्रीकृष्ण पांचाळ यांनी स्पष्ट केले.