उपमहापौरांच्या प्रभागात रस्ता खचला; खड्ड्यात ट्रकचे चाक रुतले, पालिकेच्या कारभारावर प्रश्नचिन्ह

ठाणे येथील लोकमान्य नगर भागात यापूर्वी रस्ता खचला होता. त्यानंतर इतर भागात रस्ता खचल्याच्या घटना समोर आल्या होत्या. असे असतानाच, माजिवडा परिसरातील गोल्डन डाईज नाका येथील गोल्डन टी शॉपजवळ, आय.बी. आयरन मार्टच्या बाजूला, परम हॉस्पिटलसमोर सोमवारी दुपारी रस्ता खचल्याची घटना घडली. या खचलेल्या भागात एका ट्रकचे चाक रुतले. हा ट्रक परिसरातुन जात असताना हा अपघात झाला. वर्दळीच्या रस्त्यावर हा प्रकार घडला असून याबाबत पोलिस शिपाई सौदागिरे यांनी ठाणे आपत्ती व्यवस्थापन विभागाला माहिती दिली.

घटनास्थळी कापूरबावडी पोलीस ठाण्याचे अधिकारी व कर्मचारी, आपत्ती व्यवस्थापन कक्षाचे पथक तसेच उथळसर प्रभाग समितीचे पाणीपुरवठा विभागाचे कार्यकारी अभियंता, उप-अभियंता आणि कनिष्ठ अभियंता जेसीबी यंत्रासह उपस्थित होते. सार्वजनिक बांधकाम विभागाच्या अधिकाऱ्यांनीही घटनास्थळी धाव घेतली. सुदैवाने या घटनेत कोणालाही दुखापत झाली नाही. क्रेनच्या मदतीने खचलेल्या रस्त्यात अडकलेला ट्रक बाहेर काढण्यात आला. यानंतर जेसीबीने खचलेला रस्ता खणला. त्यावेळी मोठ्या प्रमाणात रस्ता खचल्याचे निदर्शनास आले आणि त्यात मोठ्या प्रमाणात पाणी साठलेले होते.

वीस ते पंचवीस दिवसांपूर्वी या भागात सुमारे नऊ मीटर खोल आणि १५०० मिमी व्यासाची जलवाहिनी टाकण्यात आली होती. त्यानंतर घटनास्थळच्या समोरील बाजूस रस्त्यावर एक ते दोन फूट खोल खड्डे पडल्याचे दिसून आले होते. आता पुन्हा जलवाहिनी टाकलेल्या भागात रस्ता खचला आहे. यामुळे जलवाहिनी कामामुळेच रस्ता खचल्याचा अंदाज व्यक्त केला जात आहे. तसेच बाजूच्या गटारातून पाणी गळती झाल्याने जमिनीची धूप होऊन रस्ता खचल्याचाही अंदाज व्यक्त होत आहे. पालिकेच्या पथकाच्या तपासणीनंतरच रस्ता खचण्याचे कारण स्पष्ट होईल.