ठाणेकरांची मेट्रोची प्रतिक्षा संपण्याच्या दिशेने – तीन हात नाका भागात येत्या दोन दिवसांत मेट्रोचे डबे रुळांवर

ठाणे शहराची लोकसंख्या गेल्या १५ ते २० वर्षांत मोठ्या प्रमाणात वाढली आहे. त्याचबरोबर वाहनांची संख्याही वाढल्याने शहरातील वाहतूक कोंडीची समस्या दिवसेंदिवस गंभीर होत आहे. या पार्श्वभूमीवर ठाण्यातील वाहतूक कोंडी सोडविण्यासाठी मेट्रो मार्गिकेचा पर्याय पुढे आला. मुंबई महानगर प्रदेश विकास प्राधिकरणाकडून (एमएमआरडीए) सुमारे दहा वर्षांपूर्वी मेट्रो-४ (वडाळा-घाटकोपर-कासारवडवली) मार्गिकेच्या कामाला सुरुवात करण्यात आली.

कासारवडवलीपुढील ओवळा, गायमुख आणि भाईंदरपाडा या भागांमध्ये गेल्या काही वर्षांत मोठे गृहप्रकल्प उभे राहिल्याने लोकवस्ती वाढली. त्यामुळे मेट्रो-४ अ मार्गिकेचेही काम हाती घेण्यात आले. मेट्रो-४ ही ३२.३२ किलोमीटर, तर मेट्रो-४ अ ही २.७ किलोमीटर लांबीची मार्गिका आहे. सध्या या दोन्ही मार्गिकांच्या कामांना ठाणे शहरात काही प्रमाणात वेग आला असून घोडबंदर आणि कॅडबरी जंक्शन परिसरात स्थानकांच्या कामांसह विविध कामे सुरू आहेत.

मेट्रोच्या प्रत्यक्ष धावण्याची ठाणेकरांची प्रतीक्षा गेल्या वर्षी काही प्रमाणात संपण्याची चिन्हे दिसली होती. सुमारे वर्षभरापूर्वी कासारवडवली येथे मेट्रोचे डबे रुळांवर चढविण्यात आले होते. त्यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या उपस्थितीत या मार्गिकेवर मेट्रोची चाचणी घेण्यात आली. त्यामुळे घोडबंदर परिसरात लवकरच मेट्रो धावेल, अशी अपेक्षा निर्माण झाली होती. मात्र, मेट्रो सेवा प्रवाशांसाठी सुरू करण्यापूर्वी रेल्वे सुरक्षा आयुक्तांकडून (सीएमआरएस) सुरक्षा तपासणी आणि प्रमाणपत्र मिळणे आवश्यक होते.

ही प्रक्रिया पूर्ण न झाल्याने मेट्रोचे डबे कासारवडवली परिसरात बराच काळ उभे होते. याबाबत ‘लोकसत्ता’ने ठाणे शहरातील मेट्रोच्या रखडलेल्या प्रक्रियेवर प्रकाश टाकला होता. त्यानंतर सीएमआरएसकडून मेट्रो मार्गिकेची सुरक्षा तपासणी आणि अहवाल तयार करण्याची प्रक्रिया सुरू करण्यात आली. सुरक्षा प्रमाणपत्र मिळाल्यानंतर एमएमआरडीएकडून मेट्रोचे डबे पुढील टप्प्यात नेण्याची तयारी सुरू झाली आहे. त्यानुसार तीन हात नाका परिसरात मेट्रोचे डबे रुळांवर चढविण्याच्या कामाला येत्या दोन दिवसांत सुरुवात होणार असल्याचे सूत्रांनी सांगितले.

येत्या दोन दिवसांत तीन हात नाका येथे मेट्रोचे डबे रुळांवर चढविले जाणार आहेत. त्यांसदर्भात प्रक्रिया सुरू आहे. ठाणेकरांसाठी मेट्रोच्या दिशेने हे महत्त्वाचे पाऊल आहे असे एमएमआरडीएने स्पष्ट केले.