Thane District Rain Alert: ठाणे जिल्ह्यात उद्या ‘ऑरेंज’ तर, परवा ‘रेड’ अलर्ट; हवामान विभागाने वर्तविला अंदाज

गेल्या दोन दिवसांपासून ठाणे जिल्ह्यात मुसळधार पाऊस पडत आहे. जून महिन्याच्या अखेरीस जिल्ह्यात पावसाने जोर धरला आहे. मुसळधार पावसामुळे पाणी साठणे, झाडे पडणे अशा घटना घडत असून या पावसामुळे नागरिकांची दाणादाण उडाली आहे. असे असतानाच, मुंबई प्रादेशिक हवामान विभागाने १ जुलै २०२६ रोजी येत्या तीन दिवसांत पडणाऱ्या पावसाचा अंदाज वर्तविला आहे.

यानुसार, ठाणे जिल्ह्यात ३ जुलै पर्यंत ऑरेंज अलर्ट, तर ४ जुलै रोजी रेड अलर्ट आणि ५ जुलै रोजी ऑरेंज अलर्ट घोषित करण्यात आलेला आहे. या कालावधीत अतिवृष्टी, मुसळधार ते अतिमुसळधार पाऊस, मेघगर्जनेसह विजांचा कडकडाट, तसेच काही भागांत पाणी साचणे, पूरपरिस्थिती निर्माण होणे आणि वाहतूक विस्कळीत होण्याची शक्यता वर्तविण्यात आली आहे.

या पार्श्वभूमीवर नागरिकांनी अनावश्यक प्रवास टाळावा तसेच सतर्क रहावे असे आवाहन ठाणे जिल्हा प्रशासनाने नागरिकांना केले आहे. तसेच विद्यार्थी, शिक्षक व शिक्षकेतर कर्मचारी यांच्या सुरक्षिततेस सर्वोच्च प्राधान्य देऊन संबंधित शाळा व्यवस्थापनाने स्थानिक हवामान आणि पूरपरिस्थितीचा सातत्याने आढावा घ्यावा.

विद्यार्थ्यांच्या सुरक्षिततेस धोका निर्माण होण्याची शक्यता असल्यास संबंधित शिक्षण विभाग, स्थानिक प्रशासन, महसूल विभाग आणि आपत्ती व्यवस्थापन यंत्रणेशी आवश्यक समन्वय साधून आपल्या कार्यक्षेत्रातील प्रत्यक्ष परिस्थितीचा विचार करून शाळा सुरू ठेवणे अथवा बंद ठेवणे याबाबतचा योग्य निर्णय स्थानिक स्तरावर तात्काळ घेण्यात यावा. घेतलेल्या निर्णयाची माहिती संबंधित शिक्षण विभाग, पालक व स्थानिक प्रशासनास त्वरित उपलब्ध करून द्यावी, असे जिल्हा प्रशासनाने जाहीर केले आहे.