Video : ठाण्यात धावत्या टिएमटी बसला आग; चालकाच्या सतर्कतेमुळे २५ प्रवाशांचे वाचले प्राण

ठाणे महापालिकेच्या परिवहन उपक्रमामार्फत ठाणेकरांना सार्वजनिक वाहतूकीचा पर्याय उपलब्ध करून देण्यात येतो. शहरातील तसेच शहराबाहेरील विविध मार्गांवर बसगाड्या चालविण्यात येतात. या बसगाड्या ना दुरुस्त होण्याचे प्रकार गेल्या काही दिवसांपासून घडत असतानाच, यातील एका बसगाडीच्या इंजीनमध्ये बुधवारी दुपारी आग लागली. या प्रकारामुळे प्रवाशांमध्ये भीतीचे वातावरण पसरले होते. परंतु वाहक आणि चालकांच्या प्रसंगावधानामुळे प्रवासी बचावले. या घटनेच्या निमित्ताने प्रवाशांच्या सुरक्षिततेचा प्रश्न ऐरणीवर आला आहे.

टिएमटीची बस सिडको बस डेपोकडून भिवंडी येथील काल्हेर भागात जात होती. ही बस साकेत रोड मार्गे जात होती. या बसवर सुशील सुहास शेलार हे चालक होते. तर, सागर पष्टे हे वाहक होते. या बसचे सायलेन्सर गरम होऊन किरकोळ आग लागली होती. रस्त्यावरून जात असलेल्या चालकांनी हि माहिती बसचालकाला दिली. यानंतर चालकाने तात्काळ बस बाजूला घेऊन प्रवाशांना तात्काळ खाली उतरण्याची सुचना केली.

View this post on Instagram

A post shared by Loksatta (@loksattalive)

या टिएमटी बसमधून सुमारे २० ते २५ प्रवाशी प्रवास करत होते. घटनास्थळी असलेले वाहतूक पोलीस कर्मचारी, बसचे चालक आणि वाहक यांच्या मदतीने सर्व प्रवाशांची सुखरूप सुटका करण्यात आली. या घटनेची माहिती मिळताच राबोडी वाहतूक पोलीस अधिकारी आणि कर्मचारी, आपत्ती व्यवस्थापन कक्षाचे कर्मचारी घटनास्थळी दाखल झाले. अग्निशमन दलाच्या जवानांनी ही आग विजवली. या घटनेत कोणालाही दुखापत झालेली नाही.