Thane Trimandir Balkum Saket Road: ठाणे येथील बाळकुम – साकेत मार्गालागत भव्य त्रिमंदिराची उभारणी करण्यात आली असून हे मुंबईतील सर्वात मोठे त्रिमंदिर आहे. तीन दिवसांच्या प्राणप्रतिष्ठेनंतर त्रिमंदिर भाविकांसाठी खुले करण्यात आले आहे. शहरातील नवे आध्यात्मिक केंद्र म्हणून हे मंदिर ओळखले जात आहे. मात्र, त्रिमंदिर म्हणजे काय आणि हे मंदिर उभारणी मागची संकल्पना काय हे जाणून घेऊया.
ठाणे पश्चिम येथील बाळकुम-साकेत रोड येथे भव्य त्रिमंदिर उभारण्यात आले आहे. महावीर जैन ट्रस्टतर्फे ‘दादा भगवान फाउंडेशन’च्या सहकार्याने आणि ठाणे महानगरपालिकेच्या पाठिंब्याने हे मंदिर उभारण्यात आले आहे. या त्रिमंदिराचा तीन दिवसीय प्राणप्रतिष्ठा सोहळा उत्साहात पार पडला. ३० जानेवारी ते १ फेब्रुवारी या कालावधीत हा सोहळा पार पडला. या सोहळ्यास राज्याचे उपमुख्यमंत्री एकनाथ शिंदे यांनीही उपस्थिती लावली. या सोहळ्यानंतर त्रिमंदिर भाविकांसाठी खुले करण्यात आले आहे. मुंबई महानगर प्रदेशातील सर्वात मोठ्या मंदिरांपैकी एक म्हणून ओळख निर्माण करणाऱ्या या मंदिरात उद्घाटनाच्या तिन्ही दिवसांत भाविकांनी उपस्थिती लावली.
त्रिमंदिर भाविकांसाठी खुले
त्रिमंदिराचा तीन दिवसीय प्राणप्रतिष्ठा सोहळ्यात पारंपरिक विधी, अभिषेक, आध्यात्मिक प्रवचने आणि भक्तीपर कार्यक्रमांचे आयोजन करण्यात आले होते. महावीर जैन ट्रस्टतर्फे ‘दादा भगवान फाउंडेशन’च्या सहकार्याने आणि ठाणे महानगरपालिकेच्या पाठिंब्याने उभारलेले हे त्रिमंदिर आता सर्व धर्मीय भाविकांसाठी खुले झाले आहे. त्रिमंदिर पारंपारिक प्रार्थनास्थळाच्या पलीकडे जाईल आणि बहुआयामी आयाम घेईल. ते आधीच एक आध्यात्मिक केंद्र म्हणून विकसित केले जात आहे, जे संपूर्ण राज्यासाठी एक मैलाचा दगड ठरेल. ते सर्व धर्मामधील एकता, समावेशकता आणि सुसंवाद या आदर्शाचे खरे प्रतिबिंब बनेल. एकात्मिक चिंतनाचे एक ठिकाण जिथे विविध धार्मिक आणि सांस्कृतिक पार्श्वभूमीचे लोक श्रद्धेने एकत्र येऊ शकतात, असे आयोजकांकडून सांगण्यात आले.
दरम्यान, आशर ग्रुपचे अध्यक्ष आणि व्यवस्थापकीय संचालक आणि महावीर जैन ट्रस्टचे व्यवस्थापकीय विश्वस्त अजय आशर म्हणाले, “दादा भगवान यांच्या शिकवणींनी प्रेरित होऊन, हे त्रिमंदिर आध्यात्मिक तटस्थतेचे एक निःपक्षपाती प्रतीक आहे, जिथे सर्व धर्म एकाच पवित्र छताखाली परस्पर आदराने एकत्र राहतात. हे ठिकाण सर्व समुदायांच्या प्रार्थना, जागरण, बंधुता आणि सामूहिक कल्याणासाठी तयार केले गेले आहे.
त्रिमंदिर म्हणजे काय ?
ठाणे पश्चिम येथील बाळकुम-साकेत रोड परिसरात सुमारे १.५ एकर जागेवर त्रिमंदिर उभारण्यात आले आहे. महावीर जैन ट्रस्ट आणि दादा भगवान फाउंडेशन यांच्या संकल्पनेतून हे मंदिर उभारण्यात आले आहे. निःपक्षपातीपणा आणि सर्व धर्मांमधील ऐक्याची भावना जोपासण्यासाठी श्री सिमंधर स्वामी (जैन धर्म), भगवान शिव (शैव धर्म) आणि भगवान कृष्ण (विष्णू अवतार) आणि इतर २५ पूजनीय देवतांची एकाच व्यासपीठावर स्थापना करण्यात आल्या आहेत. हे मंदिर जयपूर येथून आणलेल्या पांढऱ्या संगमरवरी दगडापासून साकारण्यात आले आहे.
श्री सिमंधर स्वामी यांची मूर्ती १३ फूट उंच असून तिचे वजन अंदाजे १८,००० किलो आहे. हे मंदिर श्रद्धा आणि श्रद्धेचा हा दुर्मिळ आणि प्रतीकात्मक संगम सामाजिक न्यायाचे प्रतिबिंबित करतो. तसेच एकाच पवित्र छताखाली सर्व धर्माच्या आध्यात्मिक समानता, परस्पर आदर आणि सहअस्तित्वाचे सर्वात मोठे प्रतीक म्हणून उदयास येते.
त्रिमंदिर उभारणीमागची संकल्पना
दादा भगवान यांच्या शिकवणीवर आधारित या त्रिमंदिराची उभारणी करण्यात आली आहे. हे मंदिर सर्व धर्मांना समान मानणारे आणि अंतर्मनातील शांती व आत्मसाक्षात्काराचा मार्ग दाखवणारे आध्यात्मिक केंद्र आहे. येथे कोणताही धार्मिक भेदभाव न ठेवता सर्व स्तरातील भाविकांना सुसंवाद आणि आंतरिक समाधानाचा अनुभव घेण्याची संधी दिली जाते. दादा भगवान फाउंडेशन ही ना-नफा आध्यात्मिक संस्था असून ‘अक्रम विज्ञान’च्या माध्यमातून शांती, सुसंवाद आणि आनंदाचा संदेश देण्याचे काम करते. संस्था जगभरात सत्संग व आत्मपरीक्षण कार्यक्रम आयोजित करून जात, पंथ किंवा धर्मभेद न करता सर्वांना नैतिक व आध्यात्मिक मार्गदर्शन करते.
