उथळसरमध्ये बांधकामासाठी पहाटेच ड्रिलिंगचा दणदणाट, आवाजामुळे रहिवासी त्रस्त; खोल उत्खननामुळे दुर्घटनेचीही भीती

उथळसर नाका येथील धनदुर्गा सोसायटीलगत एका इमारतीचे बांधकाम सुरू आहे. या बांधकामासाठी सुमारे २० फूट खोल उत्खनन करण्यात आले आहे. या उत्खननासोबतच दररोज पहाटे ६ ते ८ या वेळेत ड्रिलिंग, दगड फोडणे आणि डीप फाउंडेशनची कामे करण्यात येत आहेत. यामुळे परिसरात प्रचंड ध्वनीप्रदूषण होत असल्याचा आरोप रहिवाशांनी केला आहे. धनदुर्गा सोसायटीचे रहिवासी प्रदीप सावर्डेकर यांनी ठाणे पोलीस आयुक्त आणि महापालिका आयुक्तांकडे याप्रकरणी तक्रार दिली आहे.

दररोज पहाटे ६ ते ८ या वेळेत ड्रिलिंग, दगड फोडणे आणि डीप फाउंडेशनची कामे करण्यात येत असून यामुळे होणाऱ्या मोठ्या आवाजाचा ज्येष्ठ नागरिक, महिला, लहान मुले, विद्यार्थी तसेच आजारी व्यक्तींना मानसिक त्रास सहन करावा लागत आहे. सकाळच्या शांततेत सुरू होणाऱ्या या कामांमुळे नागरिकांच्या दैनंदिन जीवनावर परिणाम होत असून, अनेकांनी यापूर्वीही पोलीस नियंत्रण कक्ष आणि महापालिकेकडे तक्रारी केल्या आहेत. मात्र, अद्याप कोणतीही प्रभावी कारवाई झालेली नसल्याचा आरोप सावर्डेकर यांनी केला आहे.

याशिवाय पावसाळ्यात २० फूट खोल उत्खननामुळे माती खचणे, पाणी झिरपणे, संरक्षण भिंत कोसळणे आणि शेजारील इमारतींच्या पायावर परिणाम होण्याचा धोका असल्याचेही सावर्डेकर यांनी नमूद केले आहे. अलीकडेच मुलुंड येथे उत्खननामुळे घडलेल्या दुर्घटनेचा दाखला देत ठाण्यात अशी घटना टाळण्यासाठी प्रशासनाने तातडीने संयुक्त पाहणी करून सुरक्षा उपाययोजनांची अंमलबजावणी करावी, अशी मागणी त्यांनी केली आहे.

तसेच नियमबाह्य ध्वनीप्रदूषण तात्काळ थांबविणे, शेजारील इमारतींचे स्ट्रक्चरल ऑडिट करणे आणि नियमांचे उल्लंघन आढळल्यास संबंधित विकासक, कंत्राटदार आणि जबाबदार अधिकाऱ्यांवर कठोर कारवाई करण्याची मागणीही त्यांनी केली आहे. भविष्यात कोणतीही जीवित किंवा वित्तहानी झाल्यास त्याची सर्वस्वी जबाबदारी संबंधित यंत्रणांवर राहील, असा इशाराही तक्रारीत देण्यात आला आहे.