वाद सोडविण्यासाठी गेलेल्या तरुणाची भररस्त्यात निर्घृण हत्या, सात जणांविरोधात गुन्हा दाखल

'आम्ही एरियाचे भाई', असं म्हणत प्रकाश तिखे आणि टोळीचा तरुणावर धारदार चाकूने प्राणघातक हल्ला

Thane Vartak Nagar murder case updates | Vishnu Nayar youth stabbed to death in Thane | Vartak Nagar police station crime investigation | Thane crime news today live updates

ठाण्यातील वर्तकनगर येथील शास्त्रीनगर नाका परिसरात वाद सोडविण्यास गेलेल्या विष्णू नायर या तरुणाची चाकूने भोसकून हत्या करण्यात आली; वर्तकनगर पोलीस अधिक तपास करत आहेत.(छायाचित्र - लोकसत्ता टीम)

ठाणे : येथील वर्तकनगर भागात वाद सोडविण्यासाठी गेलेल्या तरुणाची भररस्त्यात निर्घृण हत्या करण्यात आल्याचा प्रकार रविवारी उघडकीस आला. विष्णु नायर असे मृत तरुणाचे नाव असून याप्रकरणी सात जणांविरोधात गुन्हा दाखल झाला आहे.

प्रकाश तिखे, विकी तिखे, विकी करोतीया, सिद्धार्थ रोकडे, गणेश दिवे यांच्यासह इतर दोघे अशी हल्लेखोरांची नावे आहेत. वर्तकनगर येथील शास्त्रीनगर नाका भागात रविवारी मध्यरात्री २.४० वाजता विष्णु हा त्याचा मित्र मित्रांसह उभा होता. त्याचवेळी विष्णु याच्या मित्राचे प्रकाश तिखे याच्यासोबत वाद झाले. विष्णु हा वाद सोडविण्यासाठी गेला असता, प्रकाश याने त्याला शिवीगाळ करत एरियाचा भाई असून आमची दादागिरी येथे चालते असे म्हटले.

त्यानंतर प्रकाश याने त्याच्याकडील चाकू काढला. प्रकाश आणि त्याचा भाऊ विकी या दोघांनी विष्णु याच्या दिशेने धाव घेतली. विष्णु हा खाली पडल्यानंतर प्रकाश याने विष्णुच्या छातीवर बसून त्याच्याकडील चाकूने पोटाच्या डाव्या बाजूला आणि छातीच्या खाली दोनवेळा चाकूने भोसकले. तर विकी तिखे याने त्याला मारहाण केली. या हल्ल्यात विष्णु याचा जागीच मृत्यू झाला. यानंतर इतर सर्व आरोपींनी दहशत निर्माण करण्यासाठी सर्वांना जीवे मारण्याची धमकी देत पळ काढला. हत्येप्रकरणी वर्तकनगर पोलीस ठाण्यात गुन्हा दाखल झाला आहे.