ठाणे : भिवंडी येथील अंजुरफाटा भागात मेट्रो मार्गिकेच्या निर्माणाचे काम सुरू आहे. या कालावधीत जड अवजड तसेच हलक्या वाहनांची वाहतुक होऊन कोंडी होऊ नये म्हणून ठाणे वाहतुक पोलिसांनी अंजुरफाटा भागात सर्व प्रकारच्या वाहनांच्या वाहतुकीवर बंदी घातली आहे. येथील वाहतुक पर्यायी मार्गावरून वळविण्यात येणार असून त्यामुळे पर्यायी मार्ग कोंडण्याची शक्यता आहे. हे वाहतुक बदल बुधवारी रात्री १० ते गुरुवारी सकळी ६ आणि गुरुवारी रात्री १० ते शुक्रवारी सकाळी ६ यावेळेत लागू राहतील.
ठाणे ते कल्याण या मेट्रो पाच मार्गिका निर्माणाचे काम मुंबई महानगर प्रदेश विकास प्राधिकरणाकडून भिवंडी शहरात सुरू आहे. त्यामुळे अंजुर चौक ते अंजुर फाटा याठिकाणी लोखंडी गर्डर टाकण्याचे बुधवारी रात्रीपासून हाती घेण्यात आलले आहे. उरण जेएनपीटी आणि गुजरात येथून सुटणारी हजारो अवजड वाहने भिवंडी शहरात येत असतात. तसेच हलक्या वाहनांची वाहतुक देखील मोठ्या प्रमाणात होत असते. या कामा दरम्यान अपघात किंवा कोंडी होऊ नये म्हणून ठाणे पोलिसांनी वाहतुक बदल सुचविले आहेत. त्यामुळे पर्यायी मार्गांवर कोंडीची शक्यता आहे.
नवी मुंबई येथून मुंब्रा माणकोली मार्गे गुजरातच्या दिशेने वाहतुक करणाऱ्या वाहनांना गॅमन जंक्शन येथे प्रवेशबंदी असेल. येथील वाहने खारेगाव टोलनाका, कापुरबावडी चौक घोडबंदर मार्गे वाहतुक करतील. मुंबई येथून माजिवडा वाय जंक्शन नारपोली मार्गे गुजरातच्या दिशेने वाहतुक करणाऱ्या वाहनांना माजिवडा वाय जंक्शन येथे प्रवेशबंदी असेल. येथील वाहने कासारवडवली, घोडबंदर मार्गे वाहुक करतील. मुंबई, नवी मुंबई, बाळकुम नाका, अंजुरफाटा मार्गे गुजरात, भिवंडीच्या दिशेने वाहतुक करणाऱ्या वाहनांना बाळकुमनाका येथे प्रवेशबंदी असेल. गुजराच्या दिशेने वाहतुक करणारी वाहने घोडबंदर मार्गे तर भिवंडीच्या दिशेने वाहतुक करणारी वाहने माजिवडा, भिवंडी मार्गे वाहतुक करतील.
गुजरात येथून चिंचोटी नाका मार्गे अंजुरफाटा मार्गे नाशिक, मुंबई, नवी मुंबईच्या दिशेने वाहतुक करणाऱ्या वाहनांना चिंचोटी नाका येथे प्रवेशबंदी असेल. येथील वाहने चिंचोटी नाका, घोडबंदर मार्गे, गायमुख मार्गे वाहतुक करतील. अंजुरफाटा मार्गे मुंबई , गुजरातच्या दिशेने वाहतुक करणाऱ्या वाहनांना कल्याण नाका येथे प्रवेशबंदी असेल. येथील वाहने कल्याण नाका, अशोक नगर, भादवड नाका, रांजनोली नाका, कोनगाव मार्गे वाहतुक करतील. नाशिक येथून गुजरातच्या दिशेने वाहतुक करणाऱ्या वाहनांना वडपे नाका येथे प्रवेशबंदी असेल. येथील वाहने वडपे नाका, भिवंडी, वाडा मार्गे वाहतुक करतील. या वाहतुक बदलामुळे पर्यायी मार्गावर कोंडी होण्याची शक्यता व्यक्त केली जात आहे.
